Облыстық көру қабілеті төмен азаматтар кітапханасы Мәдениет және өнер қызметкерлері күні аясында 21 мамыр–21 маусым аралығында ұйымдастырылатын республикалық мәдени айлық аясында, жерлес ақын-жазушыларымыздың өрнегі мол шығармаларын зағип жандарға насихаттай отырып, еліне, жеріне деген сүйіспеншілігін арттыру мақсатында жазушы Елен Әлімжан, ақын Шырын Мамасерікованың туылғанына 70 жыл толуына орай  «Тынымсыз қалам тынысы – біздің өлкеде» атты кездесу кешін өткізді. Кеш қонақтары Қазақстан Жазушылар одағының мүшесі, белгілі жазушы, драматург, публицист Елен Әлімжан мен Қазақстан Республикасы халық ағарту ісінің үздігі, ақын Шырын Мамасерікова болды. Кездесуге келген сөз өнерінің айтулы ұстасы Елен Әлімжан оқырмандардың сұрақтарына жауап берді. Өлеңді өмір деп білген, өмірін өлеңмен өрген Шырын апамыз «Елекең екеуміздің 70 жасқа толу мерейтойымызды ескеріп, кездесу кешін ұйымдастырып, бізді шақырғандарыңызға үлкен алғысымды білдіремін. Өнер, өлең еш уақытта ескірмейді. Қаламгерлер ақиқатты жазу үшін жаралған. Бүгін қонақта отырған Елен ағаларыңның 50 жасқа толған мерейтойында шығарған өлеңді оқып берейін», – деп,  «Езу тартар елу жаста сезім гүл» өлеңін және өзінің өмірі жайлы жазған «Ар алдында» жыр шумақтарын нақышына келтіре оқыды. Ақынның оқырман жүрегінен орын алған жырларынан кітапханашы Шойра Миршарипова «Туған жер», кітапхананың жас оқырманы Әсемай Құттыбаева «Аппақ құсым – жырларым», І топтағы Жаннұр Қоңыратбаева «Отан» өлеңін  мәнерлеп оқыды. Кездесу барысында Байзақ ауданының қазақ соқырлар қоғамының мүшесі Еркін Мұхамбетов пен облыстық қазақ соқырлар қоғамы төрағасының орынбасары Токтобюбю Бакубаева ән шашуларын жолдады. Мұндай әсерлі кездесуден шабыт алған ІІІ топтағы көз мүгедегі ақын, ардагер-ұстаз Ақынбай Сәбит жазушыларымызға арнап шығарған өлеңін оқып, қолдарына табыс етті.

Әлия ЕлтҮзерова. кітапхана әдіскері. Тараз.