Бүлдіршіндер шын мәнінде бақытты. Өйткені мемлекеттік «Балапан» бағдарламасы күн тәртібінен түскен емес. Әрбір мектептің жанынан шағын орталықтар ашылуда. Облыстық, қалалық балалар ауруханалары жаңа ғимараттарға көшіп, заманауи құрал-жабдықтармен қамтамасыз етіліп, білікті мамандармен толығуда. Жазғы маусымда бүлдіршіндерді сауықтыру үшін түрлі лагерьлер жұмысқа кіріседі. Осы­ның бәрі бүлдір­шіндер үшін жасалған әлеу­меттік қамқорлық. Өркениетке ұмтыл­ған елде бала­лардың құқығы осылай қорғалса керек.

Тараз қаласындағы Тұңғыш Президент саябағында 1 маусым – Халықаралық бала­ларды қорғау күніне арналған «Балғын балалар – біздің болашағымыз» атты «Жамбыл жастары» шығармашылық ұжымының концерттік бағдарламасы өтті. Оған облысымызға танымал жас әнші-бишілер, сиқыршылар қатысып, бүлдіршіндерді қуанышқа бөледі. Шараға облыстық жастар орталы­ғының ұжымы белсене атсалысты. Концерт соңында демеу­шілердің атынан балақай­ларға сусын, балмұздақ тегін таратылды. Іңір таяған шақтағы отшашу алқара көк аспан жүзін тілгілеп, бүлдіршіндерді шаттыққа бөледі.

Қанат Тілепберген, «Ақ жол».

Тараз қаласы.