Наурыз көже қайнатқан, Қазанында ырыстың, Келді өмірді жайнатқан, Жаңа жылы шығыстың. Ынтымағын дәлелдеп, Кешсін халқым тыныш күн. Құтты болсын, әлеумет, Ұлы күні ұлыстың. Құс қанатын талдырған, Дархан мынау даламыз, Аманат қып қалдырған Атамыз бен бабамыз. Тірлік қылсақ бірлесіп, Ажырамай арамыз. Сөгілмейтін іргесі, Мәңгілік Ел боламыз. Жарқырасын күніміз, Жадырасын халқымыз. Желбіресін туымыз, Жерді жарып даңқымыз. Туған Отан төрінде, Шаттаныңыз, шалқыңыз. Наурыз – шуақ көңілге, Наурыз дәстүр – салтымыз! Олжас ОТАР. Астана.