Қазақстан халқы Ассамблеясының 20 жылдық мерейтойына орай елімізде жарияланған «Қазақстан халқы Ассамблеясы – 20 ізгі іс» акциясы аясында облыстық Ш. Уәлиханов атындағы әмбебап-ғылыми кітапханасы өңіріміздегі мүгедектерді оңалту және бейімдеу орталығының емделушілері назарына «Ұлт – ұлысқа ортақ үй – Қазақстан» тақырыбында әдеби-сазды кеш өткізді. Іс-шара барысында кітап­ханашылар ұлтаралық келісім татулықтың негізі екенін түрлі мысалдар арқылы баяндап отырды. «Ынтымағы жарасқан туған елім – Қазақстан» тақырыбындағы кітап көрмесіне сектор кітапханашысы Г. Асубаева библиографиялық шолу жасады. Кітапханашылар Отан, достық, бейбітшілік тақырыптарындағы ақындардың өлеңдерін оқыды, ән шырқады. Емделушілердің көңілінен шыққан кеш соңы «достық» биімен түйінделді. Соңыра облыстық мүгедектерді оңалту және бейімдеу орталығының директоры Е. Жүнісов кітапханашыларға алғысын білдірді.

Табиғат Абаилдаев, «Ақ жол».