Әдеп нормасына сәйкес ұжымда ауызбіршілік пен өзара сыйластық орнаған. Әдеп кодексінің талаптарына сай, әріптестер арасындағы қарым-қатынас тек іскерлік этикамен шектелмей, жоғары адами құндылықтарға негізделуі қажет. Біздің ұжымда әрбір маманның пікірі құнды, ал тәжірибелі қызметкерлердің жас мамандарға тәлімгерлік жасауы – кәсіби сабақтастықтың көрінісі. Ішкі мәдениеті жоғары ұжымда ғана мемлекеттік міндеттер сапалы әрі жедел орындалады. Қанша дегенмен мемлекеттік қызметшінің әдебі жұмыс орнынан тыс жерде де сыналады.

Қоғам алдындағы жауапкершілік – азаматтармен сөйлесу мәнерінен бастап, әлеуметтік желілердегі белсенділікке дейінгі кең ауқымды қамтиды. Біздің міндетіміз – қарапайым халыққа жақын болу, олардың мәселелеріне бейжай қарамау және кез келген жағдайда сабырлық пен сыпайылық таныту. Мемлекеттік қызметшінің әрбір іс-әрекеті халықтың билікке деген сенімін нығайтуға бағытталуы тиіс. Әдептілік пен адалдық – сыбайлас жемқорлыққа қарсы тұрудың басты қаруы. Жемқорлыққа қарсы мәдениетті қалыптастыру – бұл тек заңнан қорыққандық емес, бұл ішкі парасаттылық пен мемлекетке деген адалдықтың белгісі.

Департамент жұмысында ашықтық пен жариялылықты қамтамасыз ету арқылы біз кез келген құқық бұзушылықтың жолын кесеміз. Әдеп кодексінің талаптарын қатаң сақтау – сыбайлас жемқорлықтан таза қоғам құрудың алғышарты. Мемлекеттік мүлік пен жекешелендіру саласы – ел экономикасының күретамыры іспеттес. Бұл бағытта қызмет ету әрбір маманнан тек кәсіби біліктілікті ғана емес, сонымен бірге мемлекет активтеріне деген ерекше жауапкершілік пен әдептілік талаптарын қатаң сақтауды қажет етеді. Әрбір мемлекеттік нысан, мейлі ол ғимарат болсын немесе кішігірім жабдық болсын, халықтың игілігі. Біздің департаменттің басты міндеттерінің бірі – осы мүліктің тиімді пайдаланылуын қадағалау және оған ұқыпты қарау мәдениетін қалыптастыру.

Мемлекеттік мүлікті нысаналы әрі үнемді пайдалану – тек заң талабы емес, бұл мемлекет қаржысына деген құрмет пен адалдықтың көрінісі. Әдеп кодексі бізді мемлекет ресурстарын ысырап қылмауға және әрбір тиынның орнымен жұмсалуын бақылауға міндеттейді. Қазіргі таңда жекешелендіру процестері мен мемлекеттік мүлікті жалға беру толықтай цифрлық форматқа көшірілген. Бұл – сыбайлас жемқорлық тәуекелдерін төмендетудің ең тиімді жолы. «Мемлекеттік мүлік» тізілімі мен электрондық сауда алаңдары (https://e-qazyna.kz/) арқылы өтетін әрбір тендердің ашықтығын қамтамасыз ету – біздің басты қағидатымыз. Әділ бәсекелестік. Біз әрбір қатысушыға тең мүмкіндік беру арқылы бизнестің мемлекеттік активтерге қолжетімділігін арттырамыз. Жариялылық.

Шешім қабылдау процесінің ашықтығы қоғам тарапынан келетін күмән мен сұрақтарды сейілтеді. Ал мүлікті бағалау, сату немесе сенімгерлік басқаруға беру кезінде мемлекеттік қызметшінің әдебі сыналады. Біз үшін кез келген жеке мүддеден мемлекет мүддесі жоғары тұруы тиіс. Әдеп нормаларын сақтай отырып, азаматтар мен кәсіпкерлерге кеңес беруде сыпайылық таныту, ақпараттың қолжетімділігін қамтамасыз ету – біздің күнделікті мәдениетіміздің ажырамас бөлігі. Қорыта айтқанда, әдеп стандарттарын ұстану – бұл заман талабы. Кәсіби мәдениетті биік қою арқылы біз мемлекеттік аппараттың сапасын арттырып, Қазақстанның жарқын болашағына өз үлесімізді қосамыз.

Мемлекеттік мүлікті басқарудағы ашықтық пен ұқыптылық – бұл «Халық үніне құлақ асатын мемлекет» тұжырымдамасының іс жүзіндегі көрінісі. Біздің әдептілігіміз бен кәсібилігіміз – мемлекеттік активтердің тиімділігі мен халықтың әл-ауқатының артуына тікелей әсер ететін фактор.

Құрманғазы ШЕРТАЕВ

Жамбыл мемлекеттік мүлік және жекешелендіру департаменті басшысының орынбасары, әдеп жөніндегі уәкіл