Кітапханалық-ақпараттық орталықтың №7 оқу залында қазақ әдебиетінің көрнекті өкілі, Халық жазушысы Қабдеш Жұмаділовтың «Тағдыр» романы бойынша Brainstorming (шығармашылық ойлау) форматындағы әдеби іс-шара өтті. Іс-шарада кітапханашылар «Бір ел – бір кітап» акциясының мәні мен тарихын таныстырып, арнайы слайдтар көрсетіп, студенттер романдағы тарихи кезеңдерді, басты кейіпкер Демежанның бейнесі мен азаттық идеясын, ұлттық бірлік тақырыптарын тереңнен талдап, өзара пікір алмасты.
Бұл талқылау – жай ғана сабақ емес, тарихпен бетпе-бет келу. Студенттер осы роман арқылы ой-өрісін дамытып, тарихи шығармаға деген өз қорытындыларын айта білді. Жиын соңында ұйымдастырушылар жастардың белсенділігін жоғары бағалап, мұндай кездесулердің оқу мәдениетін қалыптастыруда маңызы зор екенін жеткізді.
Айта кету керек, жыл сайын дәстүрлі түрде атап өтілетін «Бір ел – бір кітап» республикалық акциясы 2007 жылдан басталды. Бүгінге дейін қазақ әдебиетінің ең таңдаулы 53 классик ақын-жазушысының үздік шығармаларын оқырман қауымға ұсынып, насихаттап келеді. 2026 жылы бүкіл ел болып оқуға Қабдеш Жұмаділовтың «Тағдыр» романы таңдалды. Бұл романда халқымыздың тарихы мен тағдыры, елдік пен ерлік, ұлттық болмыс пен рухани құндылықтар терең суреттелген.
Гүлсара БАҚБЕРДИЕВА,
М.Х.Дулати атындағы
Тараз университетінің Кітапханалық-ақпараттық орталығы
«Қорды ұйымдастыру және сақтау»
бөлімінің басшысы.
Ұқсас жаңалықтар
