Өлең сөздің дүлдүлі, жыршы Жамбылдың өмірі мен шығармашылық мұрасы жас ұрпаққа кеңінен насихаттаған көрмеде ақынның әр жылдары жарық көрген жинақтары, ғылыми-зерттеу еңбектері, естеліктері мен танымдық басылымдары орын алды. Сонымен қатар Жамбыл шығармашылығына арналған әдебиеттер мен мерзімді баспасөз материалдары оқырман назарына ұсынылды.

– Тағылымды іс-шараның басты мақсаты – ұлы ақынның поэзиясындағы елдік рух пен ұлттық құндылықтарды дәріптеу, өскелең буынның әдебиетке деген қызығушылығын арттыру. Көшпелі көрме барысында кітапхана қызметкерлері оқырмандарға Жамбыл Жабаевтың өмір жолы, шығармашылық кезеңдері, тарихи тұлғалармен байланысы, сондай-ақ оның халық поэзиясындағы орны туралы мазмұнды ақпараттар берді. Ақын шығармаларындағы отансүйгіштік, әділдік, ел бірлігі тақырыптары кеңінен сөз болды. Іс-шараға қатысқан ауыл тұрғындары мен жас оқырмандар жыр алыбының мұрасымен жақынырақ танысып, рухани азық алды. Көшпелі көрме аясында ұйымдастырылған әдеби шолу мен пікір алмасу қатысушылардың ерекше қызығушылығын тудырды, – дейді Ш.Уәлиханов атындағы облыстық әмбебап ғылыми кітапханасының дамыту бөлімінің меңгерушісі Айгүл Түктиева.

Мұндай маңызы зор бастамалар ұлттық әдебиетіміздің алтын қорын насихаттауға, жас ұрпақтың рухани дүниесін байытуға зор үлес қосары сөзсіз. «Жамбылдың жыр керуені» – өткен мен бүгінді жалғаған, рухани сабақтастықты дәріптеген мазмұнды мәдени іс-шара болғанын қатысушылардың түйген ойын өзара бөліскен пікірлесулерінен байқадық.

Қамар ҚАРАСАЕВА