Ұлағатты ұстаз, өнер қайраткерінің ғибратты ғұмыры арқылы замана тынысы әріптес достар, ағайын-туыстың естелігі топтастырылған жаңа жинақ адамгершілік қасиеттерді дәріптейді. Естелік авторлары ізгілік, игілік, адалдық, ар тазалығы, имандылық сынды адамзатқа ортақ құндылықтарды ұстаздың бойынан көргендерін айта келе, оның адами қарым-қатынастағы маңызын көпке үлгі еткен.

– Колледжімізде 40 жылдан астам уақыт ұстаздық етіп, талай талантты шәкірттерді тәрбиелеген ардагер ұстаз Әуесбай Бақбергенұлының ізгі қасиеттері айтылған кітап қалың оқырманға арналған. Бұл біз үшін үлкен қуаныш, тәрбие құралы іспеттес. Себебі, ұстаздың түрлі жағдайлардағы игілік көрсеткен әректтері арқылы өмірден жақсы жол табу анық айтылған. Осы колледжге қызмет етуге келгенде Әуесбай Бақбергенұлымен әріптес болып, бірге жұмыс істедік. Білгенін айтып, кеңесін беріп, қамқорлығын көрсетті, – дейді Абай атындағы Жамбыл гуманитарлық жоғары  колледжінің оқытушысы Гүлнұр Жолдасбаева.

Өскемен педагогикалық институтынан «Ән-күй пәнінің оқытушысы» маман­дығын меңгерген Әуесбай Бақбергенұлының дәрісін тыңдап, тәрбиесін алған шәкірттерінің арасында көпшілікті талантымен тәнті етіп, танылған өнерпаздар бар.  Шәмші Қалдаяқов атындағы халықаралық ән байқауының дипломанттары Светлана Байқұлақова, Назкен Қошқарбаева, «Жас қанат» республикалық жас орындаушылар байқауының дипло­манты, Мальта мемлекетіндегі халық­аралық ән фестивалі лауреаты, эстрада әншісі Тахмина Әшімбекова, Кенен Әзірбаев атындағы филармония директорының орынбасары, Мәдениет саласының үздігі Жандос Омаров және тағы басқа шәкірттерінің шоқтығы биік.

Жаңа жинақтың таныстырылымында ұлағатты ұстаздың әріптестері, достары жылы лебіздерін білдірді.

Қамар Қарасаева