Әлемді тануы үшін, ақпарат алу және бөлісу үшін бүгінгі таңда ақпарат технологиясының рөлі кімге де болса аса маңызды. Таразда қос жанарынан айырылғандар техника тілін меңгеруде. №2 «Болашақ» арнайы мектеп-интернатында «Зағип және компьютер» үйірмесі бойынша дәріс алған көру қабілеті нашар оқырмандар арасында «Кедергісіз келешек» атты байқау өтті. Жүргізілген сабақтар нәтижесінде біліктілік танытқан 4 білім алушы іріктеліп, сайыс ережесіне сәйкес үш кезеңмен өздерінің бағын сынады.
– Біздерді кейде мүмкіндігі шектеулі жандар деп жатады. Мен өзімді олай атамас едім. Дамыған заманда біз де креативті болуымыз керек. Пернетақтада жылдам теріп, жаза білуіміз керек. Соның бәрін үйрендік, – дейді Айзере Байбосын есімді үйренуші.
Бекітілген қазылар алқасы барлық қатысушылардың жауаптарын қарап, жүлделі орындарды анықтады. Нәтижесінде І орынды Айзере Байбосын, ІІ орынды Асхат Байболов, ІІІ орынды Мәншүк Әмірбек өз қанжығасына байлап, бағалы сыйлықтармен марапатталды. Альбина Қуанышбаева Алғыс хатпен марапатталып, ынталандыру сыйлығына ие болды. Сонымен қатар, дәстүрлі түрде арнайы кітапханада 2024 жылы шығарылған нүктелі – бедерлі қарпіндегі жергілікті ақын – жазушылар мен мерейтой иелерінің бірқатар әдеби кітаптары №2 «Болашақ» арнайы мектеп – интернатына тарту етілді.
Эльмира БАЙНАЗАРОВА
Ұқсас жаңалықтар
