Бүгінгі күнге «AzNur Agro» АШӨК тауарлы сүт фермасының құрылысы жүруде, «Момбек» шаруа қожалығының құрылыс жұмыстары тоқтап тұр, ал «Даниял» шаруа қожалығы қаржы тапшылығына байланысты жобаны биыл іске асыруды көздеп отыр. Сондай-ақ ауданда ауыл шаруашылығы саласына жақсы көңіл бөлінуде. Аудан әкімі Ерлан Қыдыралыұлының айтуынша, 2025 жылы салада өндірілген өнімнің жалпы көлемі 56,2 миллиард теңгені құраған. Оның 19,3 миллиард теңгесі мал, 36,9 миллиард теңгесі егін шаруашылығына тиесілі.

– Өткен жылы ауыл шаруашылығы саласына тартылған инвестиция көлемі 969,2 миллион теңгені, ал тамақ өнімдері өндірісі бойынша инвестиция 514 миллион 092 мың теңгені құрады. Ал ауыл шаруашылығы дақылдары өткен жылы 50211 гектарға орналастырылды. 15061 гектар масақты дәнді дақылдардан 11151 тонна дән жиналып, қамбаға құйылды. Гектарына шаққандағы өнімділік 7,4 центнер болды, – дейді аудан әкімі. Жалпы жиналған өнім 595,2 мың тонна. Ел жиі тұтынатын дақыл картоптан 6644 тонна, көкөністен 244156 тонна, майлы дақылдардан 2828 тонна, бақша дақылдарынан 19635 тонна, жүгері дақылынан 10912 тонна өнім алынған. Ал күзгі дала және жинау жұмыстарын уақытылы жүргізу мақсатында 683 ауыл шаруашылығы техникасы жұмылдырылса, оның 36-ы комбайн, 241-і трактор, 406- ы ауыл шаруашылығы тіркемелері. Осы бағытқа мемлекет тарапынан 776,5 тонна жеңілдетілген жанар-жағармай бөлініп шаруашылықтарға таратылған. Мал азығын әзірлеу бойынша белгіленген жоспарға сәйкес ауданда 294 998 тонна мал азығы дайындалған. Оның 208978 тоннасы пішен, 19 мың тоннасы пішендеме, 48020 тоннасы сабан және 19 мың тонна сүрлем. 341 гектар қант қызылшасы алқабынан 20054 тонна өнім жиналды. «Ауданда қант қызылшасын жинайтын 8 комбайын бар. Тәтті түбір баптаған 21 шаруа қожалық өнімдерін Меркі қант зауытына өткізіді. Балтамырдың гектарға шаққандағы орташа өнімділігі 588 центнерді құрады», – дейді аудан әкімі.

Бұдан бөлек, аудан аумағында 15 жылыжай жұмыс істеуде. Өткен жылы бұл жылыжайлардан 13,6 тонна қияр жиналған. Сонымен қатар 0,06 гектар аумаққа орналастырылған 50 мың гүл тұрғындарға сатылған. Ал сыйымдылығы 11980 тоннаны құрайтын көкөніс және жеміс сақтайтын 9 қоймада азық-түлік қоры жасақталған. Бүгінде осы қоймалардың 4-де барлығы – 810 тонна өнім сақтауда тұр. Оның ішінде 650 тонна пияз, 160 тонна сәбіз бар.

– Ауданда табысты жүзеге асырылған жобаның бірі – «Ауыл аманаты». Жоба аясында 13 ауылдық округтен жалпы құны 758 миллион 200 мың теңгені құрайтын 110 жобаны іске асыру бойынша ұсынымдар берілген. Оның ішінде ауыл шаруашылығы бойынша 35, кәсіпкерлік және өнеркәсіп саласына қатысты 75 жоба бар. 2024-2025 жылдары «Ауыл аманаты» жобасының бесінші бағыты «Тұрғындардың өз кәсібін ашуға немесе кеңейтуге арналған шағын жобалары» аясында ауданнан барлығы 80 жоба қаржыландырылды. Берілген қаражат 573,6 миллион теңге. Сондай-ақ 56 жобаға 400,07 миллион теңге несие берілді. Тоғыз ауылдық округтің азаматтары несие алып жұмыс істеуде. Ал 2024 жылы 24 жобаға 173,5 миллион теңге берілген болатын, – дейді Ерлан Қыдыралыұлы.

Ауданда көкөніс қоймаларын салу және сақтау жұмысы табысты жүргізіліп келеді. Мұнда жыл соңына дейін жобалық құны 2,7 миллиард теңгені құрайтын 2 көкөніс қоймасының құрылысы жоспарланған. Айшабибі ауылдық округі аумағындағы «Ализа» жауапкершілігі шектеулі серіктестігі құны 1,9 миллиард теңгені құрайтын жеті мың тонналық көкөніс сақтау қоймасының құрылыс жұмыстарын аяқтады. Ал, екінші көкөніс қоймасының құрылыс жұмыстары жүруде. «Тараз» әлеуметтік кәсіпкерлік корпорациясы» акционерлік қоғамы тарапынан 500 миллион теңге несие беріліп, тиісті жұмыстар жүргізілуде. Ал қайта өңдеу саласында екі инвестициялық жобаны іске асыру жоспары қойылған.

Бүгінгі таңда «АТБ» шаруа қожалығының сүтті қайта өңдеу бағытындағы цехы іске қосылып жұмыс істеуде. Сондай-ақ екі ірі жоба «Рыжибаев» жеке кәсіпкерлігі тарапынан қолға алынған ет бағытындағы құс фабрикасының құрылыс жұмыстары жүргізілуде. Жоба құны бір миллиард теңгені құрайды.

– Ауыл шаруашылығы жұмысына серпін беретін ол техника. Өткен 2025 жылы ауданда 41 ауыл шаруашылығы техникасын алу жоспарланған. Бүгінде жоспар 104,8 пайызға орындалды. Нақтырақ айтсақ, 43 техника алынды, оның біреуі комбайн, 42-і трактор. Сондай-ақ шаруа қожалықтарын қолдау мақсатында 9 тауарлық несие берілді. «Ынтымақ», «Шерхан», «Утемгалиев», «Мансұр», «Диар», «Д.Сматов», «Алтынбек» шаруа қожалықтарының 260 қойы тауарлы несие түрінде рәсімделіп берілді. Сонымен қатар мал өнімін экспорттаушылар қатарына тағы бір шаруа қожалығы қосылды. Бүгінде Гродеково ауылдық округіндегі «Джумабаев Д.Д.» жеке кәсіпкерлігі Ресей Федерациясына шұжық өнімдерін экспорттауда, – дейді аудан басшысы.

Марат ҚҰЛИБАЕВ

Жамбыл ауданы