Сауалнамаға қатысқандардың басым бөлігі жасанды интеллектіні күнделікті өмірде қолданатынын айтты. Олардың айтуынша, ЖИ көбіне: – оқу мен ақпарат іздеуде, – мәтін жазу мен аудармада, – идея генерациялау мен жоспар құруда, – дизайн мен контент жасауда қолданылады. Жастардың көпшілігі ЖИ-ды «уақыт үнемдейтін, ойды жүйелеуге көмектесетін құрал» деп бағалайды.

ЖИ жұмыс орындарына қауіп төндіреді ме?

Бұл сұраққа пікірлер екіге бөлінді. Сауалнамаға қатысқандардың бір бөлігі кейбір мамандықтардың өзгеруі немесе қысқаруы мүмкін екенін мойындаса, екінші бөлігі ЖИ жаңа мүмкіндіктер мен жаңа кәсіптерге жол ашатынын атап өтті. Көпшілік жастардың ортақ ойы – ЖИ адамды толық алмастырмайды, бірақ адамнан жаңа дағдыларды талап етеді. Яғни болашақта технологияны меңгерген маман ғана бәсекеге қабілетті болады.

Сонымен қатар жастар ЖИ-дың артықшылығы ретінде ақпаратты жылдам өңдеу, шығармашылыққа серпін беру және білім алуды жеңілдету мүмкіндігін атады. Ал алаңдататын тұстарының қатарында дербес деректердің қауіпсіздігі, жалған ақпараттың көбеюі және адам ойлау қабілетінің әлсіреуі мүмкін екені айтылды. Осы тұста жастардың бірі: «ЖИ – ақылды құрал, бірақ оны қалай қолдану өзімізге байланысты» деген пікір білдірді.

Сауалнама нәтижесі жастардың тек технологияға ғана емес, адамдық құндылықтарға да мән беретінін көрсетті. Қазақтың «Ақыл, қайрат, жүректі бірдей ұста» деген сөзі бүгінгі ЖИ дәуірінде де өз маңызын жойған жоқ. Жастардың ойынша, технология дамыған сайын жауапкершілік те қатар жүруі тиіс. Сауалнама көрсеткендей, қазақстандық жастар жасанды интеллектіні қауіп емес, мүмкіндік ретінде қабылдайды. Олар ЖИды дұрыс бағытта қолдану арқылы білімін жетілдіріп, кәсіби дамуға жол ашуға болатынын түсінеді. Демек, ЖИ – жастар үшін болашақтың емес, бүгіннің технологиясы.

Мақпал СҮЙІНБАЙ.