Осы мекемеде еңбек етіп жүрген Ләззат Биржанова «Тамақтандыруды ұйымдастыру» мамандығының өндірістік оқыту шебері. Оның мұнда жұмыс істеп келе жатқанына он үш жылдан асқан. Бүгінде алпыс жастың асқарына шыққан Ләззат Сәбитқызы еңбек жолын 1987 жылы Мырзатай түйетауық фабрикасында экономист болып бастаған. Жамбыл технологиялық институтының «Азық-түлік тауарлары өнеркәсібінің экономикасы және оны ұйымдастыру» факультетін тәмамдаған ол бұл жұмысқа оқу орнының жолдамасымен орналасқан екен. Сөйтіп бұл мекемеде 17 жыл еңбек етеді. Еңбектен қол үзбей жүріп, Тараз институтына түсіп, оны кәсіптік оқыту мамандығы бойынша тәмамдайды.

Бұдан кейін Ләззат Сәбитқызы Сарыкемер ауылындағы «Балалар мен жасөспірімдер орталығында» алты жыл есепші-экономист болып қызмет атқарады. Сөйтіп 2010 жылы екінші мамандығы бойынша алғашқы кезде Ю.Гагарин атындағы орта мектепте еңбек пәнінің мұғалімі болса, 2012 жылы №3 Байзақ колледжіне ауысады. Бүгінде осы білім ошағында еңбек етіп жүр.

– Мамандықтың жаманы жоқ. Абай атамыз «Жастықтың оты жалындап, жас жүректе жанған шақ. Талаптың аты арындап, әр қиянға салған шақ», – дегеніндей, заман ағымына қарай кәсіптің түрі де көбейді. Студенттерге сабақ беру барысында үнемі «Сен нені қалайсың, мамандық атауы көп, бірақ өз жаныңа лайықты біреуін таңдау – міндетің» деп айтып, бағыт-бағдар беріп отырамын.Студенттердің өзін тани білуіне бағыт сілтеу – біздің ұстаздық парызымыз. Мен өз пәнім арқылы олардың танымын өзгертіп, мамандықтың қырсырын терең танытып, ұғындыруға тырысамын. Мамандық арқылы адам өзін тәрбиелейтінін саналарына құйып, бұл өмірден өз орнын табуға септескім келеді. Алдымдағы жастар, студенттер мамандық таңдауда қателеспесе, өмірде өз орнын тапса деп тілеймін, – дейді Ләззат Сәбитқызы.

Оның шәкірттері бүгінде түрлі байқауларда топ жарып, жүлделі орындардан көрініп те жүр. Атап айтсақ, облыста ұйымдастырылған «Аспаздық ісі» құзыреттілігі бойынша Рахат Орынбай жүлделі ІІІ орынды, ал Нұрдос Құдайберген ІІ орынды иеленді.

Ұстаздың өзі облыс деңгейіндегі аспаздық ісі бойынша өткізілген байқаулардың ұйымдастырылуына үлес қосқаны үшін «Үздік тақырыптық жоспар – 2022» республикалық байқауында І дәрежелі дипломмен марапатталған еді. Одан басқа да алған марапаттары баршылық. Сондай-ақ үнемі білімін түрлі курстарда жетілдіріп отыратын мұғалім студенттерге сапалы білім беруді өзінің міндеті санайды.

Байзақ ауданы

Қамар ҚАРАСАЕВА