Міндетті әлеуметтік медициналық сақтандыру (МӘМС) – Қазақстан Республикасында барлық азаматтарды медициналық көмекпен қамтамасыз етуге бағытталған міндетті сақтандыру жүйесі. Бұл жүйеге қатысу арқылы адамдар жоспарлы диагностикалық қызметтерден бастап, амбулаториялықемханалық, стационарлық және оңалту қызметтеріне дейін емделу мүмкіндігіне ие болады. 2026 жылы денсаулық сақтау министрлігінің бастамасымен, жүйені әлеуметтік бағытқа бұру мақсатында аталған жүйеге өзгерістер мен толықтырулар енгізілді. Соның бірі жұмыссыз азаматтарды да МӘМС жүйесімен қамтуға бағытталған.
Бұрын жүйе негізінен жұмыс істейтін азаматтар мен белгілі әлеуметтік жеңілдігі бар топтарға бағытталып, жұмыс істемейтін немесе тұрақты жұмысы жоқ азаматтар МӘМС жүйесіне кірмей, жоспарлы медициналық қызметті тегін алуда біршама кедергілерге кезіккенін жоққа шығара алмаймыз. Ал енді, жаңадан енгізілген өзгерістер бойынша, 2026 жылдың 1 қаңтарынан бастап Қазақстанда жұмыссыз және тұрақты табысы жоқ азаматтар автоматты түрде МӘМС жүйесімен қамтылатын болды. Ол үшін жергілікті атқарушы органдар, яғни әкімдіктер МӘМС жарналарын жұмыссыздар мен әлеуметтік осал топтар атынан төлейді.
Бұл жерде дағдарыстық (D) және төтенше (E) санатты әл-ауқаттағы азаматтар да арнайы қамтылады. Сондай-ақ «Жұмыссыз» мәртебесін ресми тіркеген азаматтар үшін де жоспарлы медициналық қызметтер тегін түрде қолжетімді болады. Азаматтар «Сақтандырылған» немесе «Сақтандырылмаған» мәртебесін бірнеше жолдармен тексере алады.
Мысалы, SaqtandyryBot Telegram-боты арқылы, Damumed немесе Qoldau 24/7 мобильді қосымшаларында, кейбір банктердің мобильді қосымшаларында, әлеуметтік медициналық сақтандыру қорының ресми сайтында өздерінің жеке сәйкестендіру номері (ЖСН) арқылы анықтай алады. Қорыта айтсақ, биылдан бастап МӘМС жүйесі осал топтағы халық санатына, соның ішінде жұмыссыз азаматтарға да кеңінен қолжетімді болмақ.
Аймақ әкімдіктері жақын уақытта осы өзгерістерді іске асырады және азаматтар өз мәртебесін емхана қызметкерлерінің көмегі арқылы немесе жоғарыда көрсетілген электронды сервистерден тексере алады.
Жеңіс ТОЙШИБЕКОВА
Тараз қалалық №2 емхананың бас дәрігері
Ұқсас жаңалықтар
