Алматы қаласында Абай атындағы тереңдете оқытатын республикалық мектеп – интернатының ұйымдастыруымен «Мен жастарға сенемін!» атты республикалық оқушылар айтысы өтпекші. Осыған орай облыстық «Айтыс ақындары мен жыршы термешілері» орталығы оқушылар арасында іріктеу айтысын өткізді. Оған Тараз қаласынан және аудандардан он талапкер қатысты. Іс-шараның ашылу кезеңінде аталған орталықтың директоры Ахметжан Өзбеков барша ақындарға сәттілік тіледі.
Қазылар құрамында Айтмұханбет Исақ, Ербол Қамбатыр, Есет Досалы секілді елімізге танымал айтыскерлер отырды. Бұл жыр додасында Жамбыл ауданы, Айша бибі орта мектебінің 8 сынып оқушысы Мирас Жамалбек пен Талас ауданы, Мыңатай Қыстаубаев орта мектебінің 10-сынып оқушысы Маржан Серік суырылып, шешуші кезеңге шықты.
Екі жүйріктің арасындағы айтыс тартысты өтті. Маржанның сөздері маржандай сұлу болса, Мирас тапқырлығымен ерекшеленді. Қазылар алқасының шешімімен Мирас Жамалбек жеңімпаз атанып, «Мен жастарға сенемін!» атты республикалық оқушылар айтысына жолдама алды.
Айтысқа қатысқан барлық өнерпаздарға диплом және сыйлықтар берілді. Алдағы айтыста Мирасқа жеңіс тілейміз. Осылайша, ақындар орталығында бір жас таланттың тұсауы кесілді.
Дидар АПБАСОВ
облыстық «Айтыс ақындары мен жыршы термешілері» орталығы айтыс үйірмесінің жетекшісі.
Ұқсас жаңалықтар
