Солардың бірі – Жуалы ауданына қарасты Күреңбел ауылында жүзеге асқан ауыз су жобасы. Көп жылдан бері тозығы жеткен су жүйелері жаңартылып, ауылға жаңа ауыз су құбыры тартылды. Ағымдағы жылдың мамыр айында басталған құрылыс жұмыстары толық аяқталып, бүгінде ауылдағы әрбір үй мен аула таза ауыз сумен қамтамасыз етілді. Жоба аясында жалпы ұзындығы 38 шақырымды құрайтын жаңа су құбыры тартылып, заманауи талаптарға сай инфрақұрылым іске қосылды.

Бұл өзгеріс ауыл тұрғындары үшін үлкен қуаныш болды. Күрделі құрылыс жұмыстары партия бағдарламасы аясында қолға алынып, ауылдың әлеуметтік жағдайын көтеруге нақты үлес қосып отыр. Көптен күткен ауыз су жүйесінің салтанатты түрде берілуіне ауыл қариялары, тұрғындар көптеп жиналып, қуанышты оқиғаға куә болды. Алғаш болып құттықтау сөз сөлеген аудан әкімі Жалғас Мұртаза қуанышқа құтты болсын айтып, ауыл тұрғындарының өмір сүру сапасының жақсарып келе жатқанын айтты.

– Ауылға ауыз су жүйесінің тартылуына орай баршаңызды шын жүректен құттықтаймын. Бүгін біз Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы аясында Күреңбел ауылында іске асырылған ауыз су жобасының пайдалануға берілуіне жиналып отырмыз. Аудан тұрғындарының өмір сүру сапасын арттыру және таза ауыз сумен қамтамасыз ету – басты міндеттердің бірі. Қазіргі таңда аудан аумағындағы 49 елді мекеннің барлығы 100 пайыз орталықтандырылған ауыз су жүйесіне қосылған. Бұл – еліміз бойынша жоғары көрсеткіштердің бірі әрі халықтың әл-ауқатын жақсартуға бағытталған нақты қадам. Бұл бағыттағы жұмыстар 2024 жылы да толық жүзеге асты. Ауданға қарасты алты елді мекен – Түктібай, Ақтөбе, Қарасу, Көктас, Күркіреусу және Амансай ауылдарында ауыз су жүйелері қайта жаңғыртылып, бүгінде тұрғындар игілігіне пайдалануға берілді. Ал биыл Күреңбел ауылында да ауыз су жүйесін жаңарту жұмыстары табысты жүзеге асты. Ауыл тұрғындарын таза ауыз сумен қамтамасыз ету жобасын «ТаразСтрой-2004» жауапкершілігі шектеулі серіктестігі жүзеге асырды. Жобаның аясында ауыл көшелеріне жалпы ұзындығы 42,7 шақырымды құрайтын су құбыры тартылды, – деді аудан әкімі Жалғас Әлижанұлы.

Сондай-ақ Күреңбел ауылындағы ауыз су жүйесінің ашылуына орай ауылдың қадірменді қариясы, еңбек ардагері, ауданның Құрметті азаматы Жетпіс Көпбаев құттықтау сөз сөйлеп, ауылдастарына ақжарма тілегін білдірді. Ол мемлекет қаржысына салынған әлеуметтік нысанның іске қосылуын ел үшін үлкен игілікке балап, бұл бастаманың ауылдың келешегі үшін маңызы зор екенін атап өтті. Сонымен қатар жиналған қауымға ақ батасын беріп, елдің бірлігі мен берекесін тіледі. Ісшара аясында нысанның лентасы салтанатты жағдайда қиылып, тәттіден шашу шашылып, ауыл тұрғындары ортақ қуанышқа бөленді.

– Міне, ауылымызға таза ауыз су келіп, үлкен қуанышқа кенеліп отырмыз. Бұл – Президентіміз ұстанған саясаттың, ел бірлігі мен тұрақтылықтың нақты жемісі. Мемлекетіміз ауылға бет бұрып, осындай ірі жобаларды жүзеге асырып жатқанына шын жүректен ризашылығымды білдіремін. Ауыз су – тіршіліктің қайнар көзі. Бұрынғы қиындықтар артта қалып, енді әр шаңырақта таза, сапалы су ағып тұр. Бұл – нағыз елге деген жанашырлықтың белгісі. Жас ұрпақ осы игілікті көріп өссін, елінің қамын ойлайтын азамат болсын. Ең бастысы – тәуелсіздігіміз тұғырлы, халқымыз аман, жұртымыз тыныш болсын! Осы нысан елге қызмет ете берсін, әр шаңыраққа құт-береке әкелсін, – деді Жетпіс Көпбаев.

Айта кетерлігі, су мұнарасында сусорғы стансасы мен әрқайсысының сыйымдылығы 250 текше метрді құрайтын екі резервуар орнатылған. Таза ауыз су 100 метр тереңдіктен арнайы сусорғы арқылы осы резервуарларға айдалып, мұнда бактерияға қарсы тазартудан өткізіледі. Содан соң магистральды құбырлар арқылы тұтынушыларға жеткізіледі. Жобаның жалпы сметалық құны – 985 миллион теңге. Ал құрылыс жұмыстары бойынша мердігер мекемемен 916 миллион теңгеге келісімшарт жасалып, барлық жұмыстар биыл толық аяқталды. Бас мердігер – «ТаразСтрой-2004» және техникалық қадағалаушы мекеме ретінде «Құрылыс-жоба Инжиниринг» жауапкершілігі шектеулі серіктестіктері жұмыс атқарды.

Ерман ӘБДИЕВ.