Облысымызда ауыл фермерлерінің «ЖерАна» корпоративтік қоры жібек құртын өсіру ісін қолға алған болатын. Жібек құртының негізгі қорегі болатын тұт ағаштары Байзақ ауданында отырғызылып, өсірілген. Бұл жоба ауыл шаруалары және кәсіпкерлер арасында таныстырылған. Алайда жеткілікті қолдаудың болмауына байланысты жоба кеңінен қарқын алып кете алмай отыр. Осы мәселені алға тартып, «Жер-Ана» корпоративтік қорының ұйымдастырушысы Мария Ибраимова бастаған фермер әйелдер Тараз қаласының әкімі Бақытжан Орынбековпен кездесті.
«Анаға тағзым» орталығында өткен жиында Мария Қалмаханқызы жібек құртын өсірудің табысы мол екенін айтты. ؘ
– Бұл іспен үйінде отырған әйелдер де айналысуға болады. Екі айда 2-3 миллион теңге табуға мүмкіндік бар. Бұл іс көршілес Өзбекстанда өте жақсы дамыған. Солардың тәжірибесін көріп, біз бұл істі қолға алған болатынбыз. Шүкір, алғашқы табысын да алдық. Біз жұмысты үйінде бос отырған әйелдерге ұсындық. Бірақ, олар бұл кәсіппен айналысса атаулы әлеуметтік көмектен қағылатындарын алға тартады. Жібек өніміне тапсырыс көп, бірақ оны шығаруға бізде күш жоқ. Істі ілгерілетуге кәсіпкерлердің, депутаттардың қолдауы қажет, – дейді Мария Ибраимова.
Біздің елде 50-60 жыл бұрын жібек құрты өсіріліпті, бірақ алынған жібекті Өзбекстанға өткізіп отырған екен. Ал қазір өсірілсе, жібекті сатып алуға «Ауыл – Жер – Ана» жауапкершілігі шектеулі серіктестігі дайын.
Қамар ҚАРАСАЕВА
Ұқсас жаңалықтар
