Елімізде қазан айының екінші жексенбісі мүгедектігі бар адамдардың күні болып белгіленген. Осыған орай облыстық әлеуметтік оңалту орталығының мәжіліс залында салтанатты жиын өтті. Жиынды облыс әкімінің орынбасары Айжан Есмағанбетова ашып, жасалып жатқан қолдауларға кеңінен тоқталды.

– Өңірімізде 45 мыңнан астам мүгедектігі бар жан болса, олардың 7 мыңы 18 жасқа толмаған жастар. Ерекше жандардың өмірге бейімділігін жақсарту, олардың денсаулық сапасын арттыру – басты міндет. Осы санаттағы азаматтар мен азаматшаларға барынша қолайлы жағдай туғызу, оларды оңалтуға арналған заманауи құралдармен қамту, сауықтыру жұмыстарымен тұрақты айналысуына мүмкіндік жасау маңызды. Ерекше жандар – қоғамның қадірлі мүшелері. Оларға жылы сөйлеу, жанашырлық таныту осы саладағы әр қызметкердің және барлық тұрғындардың жауапкершілігі мен кісілік келбетін көрсетеді. Осынау маңызды күнде ерекше жандарға барлық жақсылықты тілеймін, – деді Айжан Серікбайқызы.

Мұнан соң Amanat партиясы облыстық филиалы идеология бөлім басшысы Берік Төлеуішов, «Мүгедектердің жастар қоғамы» қоғамдық бірлестігінің төрайымы, Тараз қалалық мәслихаттың депутаты Әйгерім Даулетбаева сөз алып, атқарылып жатқан жемісті жұмыстар жөнінде айтып өтті. Жиында қоғамдық өмірге белсене араласқан бірқатар ерекше жандарға облыс әкімінің Құрмет грамотасы, Amanat партиясы облыстық филиалы Атқарушы хатшысының Алғыс хаты және қоғамдық ұйымдардың Құрмет грамоталары тапсырылды. Жиын соңында көпшілік назарына концерттік бағдарлама ұсынылды.

Орталықтың музыка жетекшісі Батыр Бабасов хор ұжымының сүймелдеуімен патриоттық әндер шырқалды. Орталық қызметкерлері мейірімділік пен қамқорлық тақырыбына сай көріністер қойды. Төл мерекесіне орай марапат алған жандардың бірқатарын сөзге тарттық.

«Ерекше жандар санатындамын. Әрине, оны айтудан қорланбаймын. Керісінше, осы жағдайыммен де ізденіп, жақсы жетістікке жету жолында тер төгіп келемін. Қоғамдық істерге белсендімін. Бүгін облыс әкімінің Құрмет грамотасымен марапатталып отырмын. Еңбегімнің еленгеніне өте қуаныштымын», – дейді Ғани Сағындықов.

Ерекше жандарға арналған іс-шаралар Тараз қаласындағы және аудандардағы өзге де әлеуметтік орталықтарда жалғасын тапты.

Есет ДОСАЛЫ