Облыстық Ш.Уәлиханов атындағы әмбебап ғылыми кітапханада Бауыржан Момышұлының 115 жылдық мерейтойына орай «Қазақтың батыр ұлы – Бауыржан» атты бауыржантану сағаты ұйымдастырылды. Іс-шара облыс тұрғындары, әсіресе жастар арасында жергілікті қаламгерлердің туындыларын оқу, өлке тарихын, табиғатын, әдебиетін насихаттау мақсатындағы «Ел болып оқимыз» облыстық жобасы аясында өткізілді.
Жиынға М. Х. Дулати атындағы Тараз университетінің «Бауыржантану» ғылыми-зерттеу орталығының аға ғылыми қызметкері Әлімбай Найзабаев батыр туралы қызықты деректерді әңгімеледі.
– Бауыржан Момышұлының шығармаларының ішінде Міржақып Дулатовқа қатысты материалдар бар. Биыл, айтулы батырдың 115 жылдығы болса, Міржақып Дулатовтың туғанына – 140 жыл толып отыр. Алаш зиялысының екі өлеңін батыр атамыз орыс тіліне аударған. Міржақыптың идеяларын Бауыржанның шығармаларынан кездестіруге болады. Жастардың бойына отаншылдық рух сіңдіріп, өз Отаны мен Ана тіліне деген құрметін арттырып, әдебиетті сүюге баулуда Бауыржан Момышұлы туралы шығармалармен қатар, батырдың өзі жазған туындыларды да оқытудың маңызы зор, – деді Әлімбай Аманбайұлы.
Бауыржантану сағатына қатысқан «125 international school» мектебінің директоры Йылдырай Абдуллах пен тарих пәнінің мұғалімі Сәт Қуантай, Қазақстан Студенттер Альянсы ұйымының облыстық филиалының төрағасы Дархан Байпақ, Ғ.Мұратбаев атындағы №17 орта мектебінің кәсіптік бағдар беруші педагогі Замира Кожағалиева, «Әлихан Бөкейханов атындағы №1 гимназияның кәсіптік бағдар беруші педагогі Абай Қаспақов, Шерхан Мұртаза атындағы мектепгимназияның кәсіптік бағдар беруші педагогі Динара Әбілхайырова да өз ойларымен бөлісті.
Сондай-ақ жиынға қатысушы оқушылар мен студенттер көкейдегі сұрақтарын қойып, әдеби-патриоттық сағат ашық пікірлесу алаңына айналды.
Қамар ҚАРАСАЕВА
Ұқсас жаңалықтар
