Менің балалық шағым Меркі ауданы, Жамбыл ауылында өтті. 1947 жылдың сәуір айында дүниеге келіппін. Ауылымызда 4-ақ сыныптық шағын мектеп бар еді. Соған 7 жасымда оқуға бардым. Әлі есімде, мектебімізде екі мұғалім болатын. Бірі – Күміс әпкей, екіншісі – Уәли ағай. Осы екі ұстаз шәкірттеріне бар білгенін үйретті. Екеуіне де өмір бойы разымын.
Одан бөлек Әшіркүл Қасымова мектепте мұғалім ретінде де, басшы ретінде де талай шәкіртті баптап ұшырды. Ал, Базаркүл Әлмейізова №44 мектепте директор болып талай балалардың болашағына жол ашты.
«Ұстаздық еткен жалықпас, үйретуден балаға» деген осы екен, бүгінде бұл ұстаздардың тәрбиесін көрген талай шәкірт Қазақстанның түкпір-түкпірінде абыроймен қызмет етіп жүр. 5-сыныпты аудан орталығындағы Калинин атындағы мектепте оқыдым. Бірақ сегізінші сыныпта оқып жүрген кезде ауылда қалған апам қатты ауырып қалып, Дүйсебай атам мені оқудан шығарып алды. Үйге келіп сырқаттанып жатқан апама қарап, бас-көз болдым. Бірақ өз бетімше білім алуымды бір күн де тоқтатпадым. Көптеген газет-журналдарға жазылдым, кітаптар сатып алып оқыдым. Тіпті орыс тіліндегі әдебиеттерді де оқып, сауатымды жетілдірдім.
Осы газет-кітаптарды көп оқудың арқасында жоғарғы оқу орнын бітіргендей білім алдым десем болады. Кейінірек редакциялармен тығыз байланыс орнатып, өзекті мәселелер жөнінде мақалалар жазып, 35 жылдан бері аудандық «Меркі тынысы», облыстық «Aq jol» газеттерінің штаттан тыс тілшісі ретінде белсенді жұмыс істеп келемін. Осы еңбегімді бағалаған әріптестерім БАҚ мерекесінде арнайы марапаттап, мерейімді өсірді. Қазақстан Тәуелсіздігінің 30 жылдығы мерекелік медалімен де марапатталдым.
Жалпы Меркі жері – таланттардың өлкесі. Ғалым, профессорлар Темірбек Қожакеев пен Намазалы Омашев, актриса Гүлжан Әспетова, Қазақстанның Халық әртісі, композитор Алтынбек Қоразбаев, Қазақстанның еңбек сіңірген әртісі Бағдат Сәмединова осы ауданда туып-өсіп, осы жердің ұстаздарынан тәлім-тәрбие алған. Шынында ұстаз еңбегі – аса құнды, өлшеусіз еңбек. Әр адамның өмірінде білім әлеміне жол ашып берген аяулы ұстазы болады.
«Адамның адамшылығы – жақсы ұстаздан» деп ұлы Абай айтқандай, болашақ ұрпағымыздың қандай болып өсетіні мұғалімнің адал еңбегіне, педагогикалық шеберлігіне, шыдамдылығына, сондай-ақ өз жұмысына деген сүйіспеншілігіне байланысты. Сондықтан қай заманда да ұстазға деген құрмет шексіз, ұстаздықтың шоқтығы биік. Өмірлік жолымды айқындап берген ұстаздарыма мың алғыс!
Әшен ҚЫРҒАБАҚҰЛЫ,
еңбек ардагері. Жамбыл ауылы, Меркі ауданы.
Ұқсас жаңалықтар
