Ауыл шаруашылығын дамытудың басты тетіктерінің бірі – егіс алқаптарына ағын суды уақтылы жеткізу. Бұл бірінші кезекте егістік пен бау-бақшаға қатысты. Судың үздіксіз, дер кезінде берілуі өнімділікті арттыра түсетіні де белгілі. Осыған орай Жамбыл ауданының әкімі Ерлан Қыдыралыұлы аудандағы бірқатар ауылдық округтердегі ирригациялық жағдаймен танысып, жергілікті шаруалармен пікірлесті.
Атап айтқанда, аудан басшысы Ақбастау ауылдық округіндегі Қошан және Мейірман каналдары арқылы ағын судың жету барысын көзбен көріп, шаруалармен кездесті. Ауыл тұрғындары мен диқандар су көзінің негізгі бастауларындағы шлюз (бекітпе) құрылғыларын қайта қалыпқа келтіру қажеттігін алға тартып, бұл мәселені шешу аясында ұсыныст арын жеткізді. Сонымен қатар бау-бақшалар мен егістік алқаптарына су жеткізу жолдарын тиімді ету бағытында нақты ұсыныстар айтылды.
Бұдан бөлек Ерлан Қыдыралыұлы Көлқайнар және Қарасу ауылдық округтеріндегі Ташарық, Ташарық-1, Кейкі каналдарының да жай-күйін арнайы барып зерделеді.
Каналдардың тозу деңгейі, су өткізу жағдайы және шаруаларға көрсетіп отырған пайдасы кеңінен сараланып, алдағы уақытта жүргізілетін жөндеу, тазалау жұмыстарының бағытбағдары пысықталды. Аудан басшысы мұндай кездесулердің басты мақсаты – шаруалардың күнделікті күйіп тұрған мәселе сін дер кезінде тыңдап, нақты шешім қабылдау екенін атап өтті.
Шаруалармен жүздесу барысында ағын су мәселесі тек шаруашылық қана емес, әлеуметтік тұрақтылық пен азық-түлік қауіпсіздігінің де негізгі іргетасы екені айтылды.
Ақжігіт ЖЕТПІСБАЙ
аудан әкімінің баспасөз хатшысы.
Жамбыл ауданы
Ұқсас жаңалықтар
