Жамбыл ауданында егінге орақ түсті. Орақ барысын аудан әкімі Ерлан Қыдыралыұлы өзі бақылап, ауылдардағы егістік алқаптарын аралап, жергілікті диқандармен кездесті. Егінге орақ салғандардың бірі – Аса ауылындағы Сатжан Отарқосов басқаратын шағын шаруашылық. Ол былтыр 12 гектарға күздік бидай сепкен болатын. Енді егінін шашпай-төкпей жинап алу қамында жүр. Оның айтуынша, бұл суармалы алқаптың дәні толық, өнімі жоғары.
– Бүгінде «жерге дән тастау – міндет, ал оны мол өніммен қайтару – технологияны игерген адамның еншісінде», – деген түсінік қалыптасқан. Жаңа тәсілдерді пайдаланып, тың әдістермен жұмыс істеп келеміз. Соның арқасында егістік алқаптарымыз өнімділігін жоғалтқан емес, – дейді шаруа.
Аудан әкімі Ерлан Қыдыралыұлы шаруаның жұмысына оң баға берді.
– Еккен өнімім шықпады, өнім аз болды дейтін уақыт артта қалды. Қазір ауыл еңбеккерлері заманауи техниканы пайдалана отырып, өнімділікті арттыруда. Мұны осы шаруашылықтың жайқалған бидай алқабынан анық байқауға болады. Істеріңізге табыс тілеймін, – деді Ерлан Қыдыралыұлы.
Аудан басшысы Гродиково ауылдық округіне қарасты «Рыбалко» шаруашылығының жұмысымен де танысты. Мұндағы диқандар 20 гектар алқапқа бидай, 280 гектарға арпа сепкен. Қазіргі таңда шаруашылықта астық жинау науқаны қызу жүріп жатыр.
Шаруалар ауа райының қолайлы сәтін тиімді пайдаланып, егін жинау жұмыстарын уақтылы әрі сапалы аяқтауға күш салуда. Аудан әкімі астық алқаптарын аралай жүріп, техника мен қамтылу деңгейіне, астықтың шығымына және ұйымдастыру жұмыстарына назар аударды. Өз кезегінде шаруашылық өкілдері жұмыс кестесін нақты құрып, өнім жинау қарқынының жоғары екенін жеткізді.
Жалпы, аудан бойынша биылғы егістік науқаны орташа деңгейде. Шаруалар ғылым мен техниканы қатар пайдалану арқылы мол өнім алуға талпынуда. Бұл өз кезегінде өңірдің аграрлық әлеуетін арттырып, азық-түлік қауіпсіздігін қамтамасыз етуге елеулі үлес қосатыны сөзсіз.
Марат ҚҰЛИБАЕВ
Ұқсас жаңалықтар
