Тараз қаласындағы «Баласағұн» орталық концерт залында Славян жазуы мен мәдениеті күні мерекесіне арналған мерекелік іс-шара өтті. Айтулы шараны облыстық «Радонеж» орыс қоғамдастығы ұйымдастырды. Жиын барысында аталған қоғамдық бірлестік төрағасы Владимир Сорокин жиналған көпшілікті мерекемен құттықтап, ізгі тілегін білдірді.
Мерекелік кеште отызға жуық вокалдық, хореографиялық, аспаптық қойылымдар, поэтикалық шығармалар орындалды. Сонымен қатар «Ақ терек, ақ үйеңкі», «Гуляю я», «Позови меня» сынды әндер шырқалды.
«Радонеж» орыс қауымдастығының «Калинка» вокалдық тобы, «Днепро» украин этномәдени бірлестігінің «Маричка» халықтық вокалдық ансамблі, «Қоғамдық келісім» мекемесі белсенді ұзақ өмір сүру орталығының «Шабыт» хореографиялық ұжымы, «Жалын» ансамблі кеш шырайын келтірді.
Сондай-ақ Ұлы Жеңістің 80 жылдығына арналған шығармашылық ұжымның орындауындағы «Смуглянка», «Журавли», «Ты же выжил солдат», «Танго у разбитого танка», «Это было рано на рассвете», «После Победы» секілді өзге де патриоттық шығармалар көпшіліктен қолдау тапты. Мерекелік концерт жоғары деңгейде өтіп, көрермендер үшін де, орындаушылардың өздері үшін де нағыз мейрамға айналып, келушілердің жүрегінде ұмытылмас әсер қалдырды.
Есет ДОСАЛЫ
Ұқсас жаңалықтар
