– Қазіргі уақытта 222 817 сақтау бірліктің 22 073 938 парағы цифрлы форматқа көшірілді. Бұл жалпы көлемнің 22 пайызын құрайды. Бұл құнды материалдарды сақтап қана қоймай, ақпараттың қолжетімділігін айтарлықтай жақсартуға мүмкіндік береді. Цифрландыру сұраныстарды өңдеу процесін жеделдетуге көмектеседі. Мұндағы мұрағаттық анықтамалар мен құжаттардың көшірмелерін қажет ететін азаматтардың күту уақытын едәуір қысқартады. Облыстың мұрағаттары мұрағаттық анықтамалар, құжаттардың көшірмелері мен үзінді көшірмелерін беруді қамтамасыз етеді. Бұл қызметтер тегін түрде ұсынылады, – деді Ләззат Серікбекқызы.

Электрондық платформаларды біріктіру арқылы қызметтерді алу процесі жыл сайын жеңілдеп келеді. Мәселен, өткен жылы облыс архивтері 22 мыңнан астам сұранысты өңдеген. Олардың көпшілігі электрондық арналар арқылы берілген. Бұл азаматтардың цифрлық технологияларға деген сенімінің жоғары деңгейін көрсетеді.

– Цифрландырудың арқасында қызмет көрсету мерзімі қысқартылды. Орташа алғанда, сұраулар 11 жұмыс күні ішінде, ал қиын болған жағдайда 30 күнтізбелік күнге дейін өңделеді. Егер құжаттар сақтауда болмаса, азаматтар екі жұмыс күні ішінде хабарлама алады. «Архив-2025» жобасы аясында архивтік процестерді жетілдіру және цифрлық сервистерді кеңейту жалғасуда. Цифрландырылған құжаттар көлемін ұлғайту, сондай-ақ электрондық мемлекеттік платформалармен өзара іс-қимылды жақсарту жоспарлануда. Мұрағаттарды цифрландыру ақпаратқа қол жеткізуді жеңілдетіп қана қоймай, халыққа қызмет көрсету сапасын едәуір арттыруға мүмкіндік береді. Мұрағат ісіне заманауи технологияларды енгізу – әрбір азаматқа қажетті құжаттарды тез әрі қиындықсыз ала алуға жағдай жасайды, – деп атап өтті Л.Қожаханова.

Бұдан бөлек, өткен жылы облыстық мемлекеттік архиві жеке және заңды тұлғалардың өтініштерін орындау бойынша жалпы 22889 сұранысқа жауап берген. Оның ішінде мемлекеттік корпорация арқылы – 471, қағаз түрінде – 7842 болса, электронды портал арқылы 14 576 сұранысқа жауап қайтарылған.

Нұрболат АМАНБЕК