Соңғы жылдары елімізде табиғи және техногендік қауіптердің салдарын барынша азайту, төтенше жағдайларға жедел ден қоюды қамтамасыз ету және ауылдық елді мекендерді қорғау деңгейін арттыру бағытында бірқатар жұмыстар жүзеге асырылып келеді. Соның бір жарқын көрінісі – күні кеше Талас ауданының Майтөбе ауылында әмбебап өрт сөндіру бекеті ашылды.
Азаматтық қорғау нысанының ашылу салтанатына Төтенше жағдайлар вице-министрі, генерал-майор Кеген Тұрсынбаев, облыс әкімінің орынбасары Қанатбек Мәдібек, облыстық төтенше жағдайлар департаментінің басшылығы мен қызметкерлері, еңбек ардагерлері және ауыл тұрғындары қатысты.
Майтөбедегі өрт сөндіру бекеті екі шақыртуға шығуға арналған, 8 мыңға жуық халыққа қызмет көрсететін болады. Сонымен қатар 15 мыңнан астам гектар ауыл шаруашылығы алқаптары мен өңірдің су айдындарын қамтиды.
«Ауылдық жерлерде өрт құтқару бөлімшелерінің желісін кеңейту – Төтенше жағдайлар министрлігінің басты басымдықтарының бірі. Біздің міндетіміз – тұрғылықты жеріне қарамастан әрбір тұрғынды жедел қорғауды қамтамасыз ету», – деді вице министр К.Тұрсынбаев.
Іс-шара аясында вице-министр өрт сөндіру бөлімшесінің бастығына төтенше жағдайларға жедел ден қою үшін жаңа автокөліктің, өрт сөндіру автоцистернасы мен құтқару қайығының кілттерін табыс етті. Шара соңында вице-министр бастаған құтқарушылар «Таза Қазақстан» республикалық экологиялық акциясы аясында ағаш көшеттерін отырғызды.
«Aq jol» – Aqparat.
Ұқсас жаңалықтар
