Қазақстан халқы Ассамблеясының кезекті XXXIV сессиясынан делегат ретінде қатысып, үлкен әсер алдым. Мемлекет басшысы Қасым-Жомарт Тоқаев өз сөзінде Ассамблеяның 30 жылда атқарған жұмысына жоғары баға берді. Сонымен бірге елдің ынтымағы мен тұтастығын бұдан әрі де сақтауға үлес қосуға шақырды.
Бір атап өтерлігі, Президент сессияда мемлекеттік тілдің мәртебесін арттыру қажеттігіне де ерекше тоқталды. Мәселен, Мемлекет басшысы ҚХА-ның ХХХІІІ сессиясында берген тапсырмаларын іске асыру мақсатында «Мемлекеттік тіл – этносаралық қатынас тілі» жаңа жобасы іске қосылды.
Жоба аясында 2024 жылдың маусым айында Астана қаласының «Достық үйінде» «Мемлекеттік тіл – этносаралық қарым-қатынас тілі» тақырыбында дөңгелек үстел өткізілді. Дөңгелек үстел шеңберінде оқыту семинары ұйымдастырылып, еліміздің түкпір-түкпірінен қазақ тілін еркін меңгерген этнос өкілдері тілді үйрену тәжірибесімен, мемлекеттік тілдің қолданылу аясын кеңейту жөніндегі ұсыныстарымен бөлісті, сондай-ақ этносаралық қатынас тілі ретінде мемлекеттік тілдің рөлін күшейту әдістері талқыланды. Мұндай жұмыстар республикада ғана емес, біздің өңірде де атқарылып келеді.
Президентіміз айтқандай, ҚХА қызметінің негізгі бағыттарының бірі – мемлекеттік тілді дамыту. Мемлекеттік тіл – бұл азаматтық интеграцияның, мәдени-рухани бірліктің пәрменді құралы. Мемлекет басшысы сөзінде ҚХА-ны дамытудың 2022-2026 жылдарға арналған тұжырымдамасын іске асыру жөніндегі іс-қимыл жоспарын орындау шеңберінде жыл сайын мемлекеттік тілді ілгерілетуге бағытталған ҚХА жобалары мен іс-шараларын жалғастыруды тапсырды.
Бұл ең алдымен Президент көтерген «Мемлекеттік тіл – этносаралық қатынас тілі» дәрежесіне көтерілуіне оң септігін тигізеді деп білемін.
Айгүл ҚАБИЕВА
облыстық «ӘулиеАта» қазақ мәдени орталығының төраға орынбасары, М.Х.Дулати атындағы Тараз университетінің профессоры.
Ұқсас жаңалықтар
