Мемлекет басшысы Қасым-Жомарт Тоқаевтың бастамасымен өткен жылдың сәуір айынан бастап «Таза Қазақстан» республикалық экологиялық акциясы қолға алынды. Іс-шара елдегі экологиялық жағдайды жақсартуға, халықтың экологиялық мәдениетінің деңгейін арттыруға, азаматтарды қоршаған ортаны қорғау мәселелеріне тартуға бағытталған. Бүгінгі таңда аталған жоба еліміздің барлық өңірін қамтып, қалыпты экологиялық болашақтың негізін қалады.
Айта кетейік, кеше осынау акциясы аясында экологиялық шаралар марафоны бастау алды. Тазалық шарасынан әулиеаталықтар да тыс қалған жоқ. Бұл күні «Айша бибі» кесенесінің аумағы тазартылды. Оған облыс әкімінің орынбасары Серік Сәлемов, ауыл қариялары мен 100-ге жуық жас қатысты. Марафон барысында киелі орынның аумағы толығымен күл-қоқыстан тазартылып, көшеттер отырғызылды.
Экологиялық шарада облыс әкімінің орынбасары Президент бастамасымен жүзеге асып жатқан акцияның маңызы жоғары екенін атап өтіп, оған жамбылдықтар да белсене атсалысып жатқанын жеткізді.
– «Таза Қазақстан» экологиялық акциясы облыстың барлық аудандарында өткізілуде. Соның бірі – Жамбыл ауданындағы Айша бибі кесенесінің аумағын тазарту жұмыстары. Жалпы айтқанда, бүгінгі күні облыста 28 елді мекенде экологиялық шара ұйымдастырылды. Оған екі мыңнан аса адам қатысуда. Осылайша, бірлігі бекем, тірлігі түзу жамбылдықтар саябақтар мен арық-атызды және аулаларды тазартуда. Қазіргі таңда аймақта 3500-ден аса тарихи-мәдени ескерткіш бар. Негізгі басымдықты сол аумақтарды тазалау, абаттандыру жұмысына беріп отырмыз, – деді Серік Жақсылықұлы.
Еске салсақ, акция аясында жыл басынан бері 350 шақырым каналдар мен арық жүйелері, 48 мың тұрғын үй аулалары мен 1,3 мың шақырым көшелер тазаланып, 2,8 мың тонна қоқыс шығарылды. Ал, биыл егілетін 195 мың талдың бүгінге 128 мыңға жуығы отырғызылып, 2,4 мың ағаш санитарлық мақсатта бұталды.
Есен ӨТЕУЛІ
Ұқсас жаңалықтар
