Маған ғана күлімдеді мына күн,

Маған ғана білінбеді суығы.

Саған ғана жан-тәніммен ұнадым,

Саған ғана жан-жүрегім жібіді.

 

Маған ғана арналғандай ән біткен,

Маған ғана құстар құшақ жайғандай.

Саған ғана қол қусырып көндіккем,

Саған ғана сене салдым ойланбай.

 

Маған ғана сыйлап өмір жұмбағын,

Маған ғана ашқан бақыт есігін.

Саған ғана бақай есеп құрмадым,

Саған ғана жасай алдым кешірім.

 

Мен үшін сен әпересің Айды да,

Мен де алға ұмтыламын сен үшін.

...Берілмейік уайым менен қайғыға,

Мықты болайық ол үшін!..

 

 Үміт БИТЕНОВА