Мемлекет басшысы Қасым-Жомарт Тоқаев жыл басында еліміздің белді басылымдарының бірі – «Ana tili» газетіне берген «Мақсатым – экономиканы және егемендікті нығайту» атты сұхбатында «Таза Қазақстан» акциясы қоғамға экологиялық мәдениеттің жаңа талаптарын енгізу идеясынан бастау алады. Халықтың бұл бастамаға барынша қолдау білдіргеніне тәнтімін» деп атап өткеніндей, акция басталған сәттен-ақ облыс тұрғындары оған өз үлестерін барынша қосып, бұл үрдіс әлі күнге жалғасын тауып келеді. Мәселен, Amanat партиясының облыстық филиалының ұйымдастыруымен өткен «Таза бейсенбі» экологиялық акциясына Тараз қаласының тұрғындары белсене қатысты.
Партияның облыстық филиалы атқарушы хатшысының орынбасары Уалихан Болатбектің айтуынша, өңірде биылдан бастап тазалық акциясының тұжырымдамасы өзгертіліп, жаңаша бағытта қарқын алып отыр.
«Оған сәйкес, аудан, қала аралық күре жолдардың бойлары тазартылатын болады. Мәселен, өткен аптада облыстық және Байзақ аудандық филиалының қызметкерлері мен «Жастар Рухы» жастар қанатының белсенділері Қызыл Жұлдыз және Қостөбе ауылдарының аралығында күре жолдың бойын күл-қоқыстан тазартып, айналаны абаттандыруға атсалысқан еді. Осылайша, Байзақ аудандық филиалы челленджді Жамбыл ауданына жолдаған болатын. Енді міне, бүгін Жамбыл ауданы бұл бастамаға қолдау білдіріп, «Тараз-Аса аралығындағы облыстық мәндегі 3 километр күре жолдың бойын тазалады», – дейді ол.
Сөйтіп экологиялық акция аясындағы тазалық челленджін Байзақ ауданынан қабылдап алған жамбылдықтар Тараз-Аса аралығындағы күре жолдың бойын тазартып тастады. Бұл іс-шараға партия облыстық филиалы және Жамбыл аудандық филиалының қызметкелері, бастауыш партия ұйымдарының мүшелері, «Жастар Рухы» жастар қанатының белсенділері атсалысты.
– Жамбыл ауданы облыс орталығы Тараз қаласына ең жақын орналасқан аудандардың бірі. Сондықтан аудан мен қала арасында көлік ағыны бір сәтке болсын толастаған емес. Соның салдарынан күре жолдың бойына қоқыстар жиналып қалып жатады. Әрі бұл күре жол облыстық мәнге ие. Ауданға келген қонақтардың көзіне ең алдымен көзге түсетіні де жол бойы. Қай елдімекен болмасын жолының айналасы таза болуы тиіс. Осы орайда, аталған партияның облыстық филиалы «Таза бейсенбі» экологиялық акциясы аясында күре жолдардың бойын тазартуға баса мән беріп отырмыз, – дейді партия облыстық филиалы атқарушы хатшысының орынбасары Уалихан Болатбек.
Осылайша, 100-ге жуық аманаттықтар 3 километрге жуық жол бойын тазартып қана қоймай, қураған тал-дарақтарды ретке келтірді. Ол іс-шараға белсенді атсалысқан партия Жамбыл аудандық филиалы тазалық шарасын Жуалы ауданына жолдады.
Марат ҚҰЛИБАЕВ
Ұқсас жаңалықтар
