Мемлекет басшысы Қасым-Жомарт Тоқаевтың бастамасымен 2024 жылдың сәуір айынан «Таза Қазақстан» республикалық экологиялық акциясы басталған болатын. Кеше «Жеңіс» саябағында облыс әкімдігінің ақпарат және қоғамдық даму басқармасы «Жастар ресурстық орталығының» ұйымдастыруымен акция аясында «Жасыл ел» еңбек жасағының ашылу салтанаты өтті.
«Тазалық – табалдырықтан басталады» демекші, өз ауламыз бен қаламызды таза ұстау – әрбірімізге парыз. Еңбек маусымының салтанатты ашылуына облыс әкімінің орынбасары Серік Сәлемов қатысып, жастар жасағына сәттілік тіледі. Мұнан соң, облыстық ардагерлер кеңесінің төрағасы Еркінбек Солтыбаев сөз алып, жастарды жігерлендірсе «Жасыл ел» еңбек жасағының облыстағы төрағасы Сұңғат Абай жасақтың биылғы жұмысына тоқталды.
– Барлық қатысушылар бірыңғай формамен, футболкалармен және қалпақтармен қамтамасыз етілген. Оларға қажетті күрек, тырма, шелек, сөмке, қолғап сынды құрал-жабдықтар берілді. Барлық жағдай жасалған. Ең бастысы, еңбек етуге деген ұмтылыс қажет. Жазда жасақтың негізгі кәсібі – жас ағаш көшеттерін суару және күту, аумақтарды қоқыстардан тазарту. Нәтижеге қол жеткізу үшін қатысушыларға көшелер бекітілді, – деді ол.
Шағын концерттік бағдарламадан кейін еңбек жасағы қаладағы «Қарахан» мазары мен «Қызылабад» елді мекеніне көшеттер отырғызды.
Эльмира БАЙНАЗАРОВА
Ұқсас жаңалықтар
