Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық акциясы – еліміздің экологиялық ахуалын жақсартуға, қазақстандықтардың экологиялық мәдениет деңгейін арттыруға және тұрғындарды қоршаған ортаны қорғау жұмысына тартуды көздейді. Бұл ретте Президент: «Қалалар мен ауылдардың сәулетті, саябақтар мен ауланың таза болуы, ең алдымен, басқа біреуге емес, өзімізге керек. Азаматтарымыз қоғамдық орындар мен қоршаған ортаға жанашыр көзбен қарауға тиіс», – деп атап өтті.
Тату тірлік пен береке-бірліктің бесігі – Тараз қаласында да осынау экоакцияға өз үлесін қосушылардың қатары қалың. Мәселен, Наурызнама тұжырымдамасына сәйкес, «Тазару күнінде» көне қаланың аумағында ауқымды жұмыстар атқарды. Бұл күні облыс орталығының бірнеше нүктесінде тазалық жұмыстары ұйымдастырылып, онда тараздықтар іргелес аумақтар мен белгіленген аулаларды күл-қоқыстан арылтты. Тазалық жұмыстары жүргізілген орынның бірі – «Қарасу» шағынауданында орналасқан Денсаулық саябағы. Мұнда облыстық жастар ресурстық орталығының және «Жасыл ел» еріктілер жасағының 50-ден аса жастары арық-атыздар мен тасжолдағы күл- қоқыстарды ретке келтірді.
Еске салайық, осы жылдың наурыз-сәуір айларында облыс көлемінде 10,9 мың ағаш отырғызу, 17 мың шаршыметрге гүлзар мен 5,7 мың шаршыметрге көгал орналастыру, 803,8 шақырым арық жүйесі мен каналдарды, сондай-ақ 2 781 шақырым көше жолдарын тазалау жоспарланған. Бүгінгі таңда бұл жұмыс кестеге сәйкес кезең- кезеңімен жүргізілуде.
Есен ӨТЕУЛІ
Ұқсас жаңалықтар
