Кеш барысында жазушының «Айша» поэмасының зағип жандарға арналған «Брайль қарпіндегі» кітабының тұсаукесер рәсімі өтті. Мазмұнды іс-шараға «Қазақ соқырлар қоғамы» мүшелері, №2 «Болашақ» арнайы мектеп-интернатының оқушылары, Сағадат Нұрмағанбетов атындағы №10 орта мектебінің оқушылары қатысты. Сонымен қатар, М.Х. Дулати атындағы Тараз университетінің «Журналистика және филология» кафедрасының оқытушысы, филология ғылымдарының докторы, профессор Меруерт Көпбаева, «Журналистика және филология» кафедрасының оқытушысы, филология ғылымдарының кандидаты, доцент Әсима Нүсіпова, Сағадат Нұрмағанбетов атындағы №10 орта мектептің «Қазақ тілі әдебиеті» пәнінің мұғалімі Мереке Абитова сияқты арнайы қонақтар кеш көркін ашты. Сондай-ақ, №2 «Болашақ» арнайы мектеп-интернатының оқушыларынан құралған «Мұрагер» домбыра ансамблі «Жастар биі» күйін орындады. Арнайы кітапхананың тұрақты оқырманы, «Сәт» триосының мүшесі Сапар Алтыбайдың орындауында «Ауылым» әні нақышына келтіре шырқалды. Ал, №26 орта мектептің 6-сынып оқушысы Ұлжан Мұқажан «Домбыра» өлеңін оқыды.

– Әлі күнге есімде. Жоғары сыныптың оқушысы едім. Үйімде қабырға толы кітап болатын. Бірде әкем Ілияс Есенберлиннің «Ерлі- зайыптылар» атты кітабын ең жоғары сөреге қойып «әлі мұны оқуға жассың, оқыма» деді. Бірақ белгісіз нәрсе адамды қашанда қызықтырып тұрады ғой. Не болды екен, нені жасырды екен деп қызығып, мектеп оқып жүргенде- ақ сол кітапты тауысып оқыдым. Содан бері Ілияс Есенберлиннің шығармаларына ғашық болдым. Оны танымау меніңше қателік секілді. Оның шығармаларын білмеу – ұят, – деді профессор Меруерт Көпбаева.

Шындығында ұлттық рухымыздың шырағына айналған, аты әлемге мәшһүр жазушыны білмеу ұят-ақ. Іс-шара әдеби музыкалық монтажға жалғасып, көркем сөз оқылып, бейнефильм көрсетіліп, өз мәресіне жетті.

Эльмира БАЙНАЗАРОВА