Облыс руханиятының қарашаңырағы Шоқан Уәлиханов атындағы облыстық әмбебап ғылыми кітапханасының қабырғасында аптал азаматтың туған күніне орай «Ғасырдың дара тұлғасы» тақырыбында еркін форматта пікірлесу өтіп, оған ардагер журналист Тұрсынхан Толқынбаев, Қонаев атындағы қордың Жамбыл филиалының директоры Қибат Асқарбеков, ардагерлер кеңесінің жанындағы аналар ұйымының комиссия төрағасы Хадиша Оспанова, филология ғылымдарының докторы, профессор Сәмен Құлбарақ сынды арда азаматтар қатысты.

– Дінмұхамед Қонаев – Қазақстан үшін тұтас бір дәуірдің символына айналған қайраткер. Оның есімі тұрақтылық, экономикалық өрлеу және мәдени өркендеу кезеңімен байланысты. Қонаев жай ғана мемлекет қайраткері емес, өз халқының мұң-мұқтажын түсінген, салт- дәстүрін қадірлеп, өнеркәсіптік дамуы мен ұлттық болмыстың сақталуына талпынған басшы болды. Ол кәсібилікті адамгершілікпен ұштастырудың қаншалықты маңызды екенін көрсете білді. Оның мемлекетті басқаруға деген көзқарасы халықты құрметтеуге, ұлт болашағына деген алаңдаушылық пен жанашырлыққа негізделген. Оның басшылығымен Қазақстан алға қарай орасан зор қадамдар жасады, – деді журналист Тұрсынхан Толқынбаев.

Басқосуға қатысушылар Дінмұхамед Қонаевтың артына қалдырған ең құнды дүниесі – халық сенімі екеніне айрықша тоқталды. Халық өз көшбасшысының билік басында ғана емес, қасында екенін де сезінді. Оның қарапайымдылығы, шынайылығы мен қашанда өз халқының жанынан табыла білгенін көпшілікке үлгі етті.

«Бүгінгі күні оның мұрасына көз жүгіртсек, Қонаев тарихтың жай ғана бір парағы емес, жерімізді, халқымызды сүю және оған қызмет етудің ең озық үлгісін көрсетіп кеткен қайраткер екенін түсінеміз», – деп қосты Қибат Асқарбеков.

Кемеңгер тұлғаның қоғамға, мемлекетке және халқына сіңірген өлшеусіз еңбегін, ерлікке толы өмір жолын ұлықтап, өскелең ұрпаққа насихаттау мақсатында ұйымдастырылған іс-шарада қонақтар Д.Қонаевтың өмірі мен қызметі жайында құнды деректермен бөлісіп, оның ұлт үшін жасаған еңбектеріне ерекше тоқталды. Сонымен қатар, кітапхана қызметкерлері тұлғаның даналық сөздерін оқып, аптал азаматтың ғұмырындағы сәулелі сәттерді құрметпен еске алды.

Ал, Кенен Әзірбаев атындағы облыстық филармония әртісі, Мәдениет саласының үздігі Бақыт Шағырбаев қайраткерге арналған «Дәуір тұлғасы» әнін, сондай-ақ Д.Қонаевтың досы, қоғам қайраткері Асанбай Асқаровты еске алуға арналған «Алатаудың ақ иығы» әнін орындады.

Арайлы ЖАҚСЫЛЫҚ