Сол арман шәкіртім Елдос Сметовтың маңдай терімен жүзеге асқанына қуанамын. Әйгілі палуан, Мәскеу Олимпиадасының чемпионы Жақсылық Үшкемпіровтің алтын жүлдесінен кейін араға 44 жыл өткенде Олимпиада алтыны Елдостың ерлігімен қайталанып отыр. Сол арманға жамбылдық палуанның қол жеткізуі – бақыттың бақыты.

Олимпиада шыңында жүлде алу өз алдына, біз үлкен жеңіске жеткенімізді осы Тараз қаласына келген соң сезіндік. Облыс әкімі Ербол Қарашөкеев Жамбыл жұртшылығымен бірге Елдос екеумізді керемет жоғары құрметпен қарсы алып, лайықты іс-шара өткізді. Мұны Жамбыл облысы тұрғындарының ыстық ықыласы деп қабылдадық. Бұл қарсы алу – жамбылдық жас жаттықтырушылар мен спортшыларға серпін берді деп ойлаймын. «Біз де Олимпиада чемпионы бола аламыз», «Біз де Олимпиада чемпиондарын шығара аламыз» деген сенім сыйлағаны анық. Сол сенім талай жастарды жарқын жеңістерге бастайды деген үкілі үмітім бар. Лайым солай болғай!

Міне, 2025 жыл да есік қағып кіріп отыр. Жаңа жылдан жарқын үміт, жақсылық күтетініміз анық. Жаңа жылда өңір спортының барлық саласында өрлеу болуын тілеймін. Бокс, өзге де күрес түрлері, жеңіл атлетика, волейбол, су добы, көкпар, ат спорты түрлері, қол күресі бойынша үлкен жетістіктерге жетуге мүмкіндігіміз бар. Өңірдің футболының да дамып, өркендеуіне тілектеспін. Жамбыл спортының қай кезде де бәсі жоғары. Өңір спортының абыройы әрқашан асқақтай береріне сенемін. Қазір ауылдардың өзінде керемет зәулім спорт кешендері ашылып жатыр. Оның барлығы спорттың дамуына деген шынайы жанашырлық.

Еліміздің көк Туын байрақты бәсекелерде желбіретіп, Әнұранын шырқататын даңқты спортшылар шыға берсін.

Ғалымжан ЖЫЛГЕЛДИЕВ,

дзюдо күресінен Қазақстанның еңбек сіңірген жаттықтырушысы.