Өтіп бара жатқан 2024 жыл өңір мәдениеті мен руханиятында бетбұрыс жылы ретінде есте қалды. Жыл бойы өткен іс- шаралардың барлығында өзім 63 жыл қызмет еткен А.Тоқпанов атындағы облыстық қазақ драма театры ұжымының айшықты үлесі бар. Биыл театр ұжымы үшін де табысты жыл болды. Театр Астана қаласында өткен Абай атындағы мемлекеттік сыйлықтың лауреаты, жазушы Роза Мұқанованың драматургиясына арналған «ТЕАТР ALL» III халықаралық театр фестиваліне «Мәңгілік бала бейне» қойылымымен қатысып, «Сахналық жаңа форма табудағы ізденістер үшін» номинациясын иеленді.

Сондай-ақ, облыстың бірқатар аудандары мен өзге өңірлерді гастрольдік сапармен аралап, халық ықыласына бөленді. Соңғы уақытта театр репертуары бірқатар жаңа туындылармен толысып, жаңа тәжірибелерді сынап көрді. Өзге өңірлердегі режиссерлермен қарым-қатынас орнатып, өзге форматтарды енгізе алды. Жастарға мүмкіндік жасап, басымдық берді. Сол арқылы ұжымның қандай қойылым, қандай режиссер болса да бейімделе алатындығын көрсетті. Бұған «Құсалық», «Мәңгілік бала бейне», «Бақытсыз Жамал» секілді соңғы премьералардың халық ықыласына бөленуі дәлел бола алады.

Чеховша айтсақ, «Театр – тобырдан ұлт қалыптастыратын жер». Артында бай тарихы бар мәдениет ошағы бүгінгі күні көрермен қауымға үздіксіз мәдени қызмет көрсету арқылы қазақстандық патриотизмді белсенді дәріптеуге, халқымыздың ұлттық рухын көтеруге, бай мұраларымыз бен құндылықтарымызды жете танытып, насихаттауға, жас ұрпаққа сарқылмас тәрбие нәрін беруге өзіндік зор үлесін қосып келеді. Бұл үрдіс театрдың алдағы 90 жылдық мерейтойы қарсаңында да жалғасын табатындығына сенімдімін.

Біз келе жатқан Жаңа жылдан зор үміт күтеміз. Келесі жыл еліміз үшін жемісті жыл болады деп сенемін. Еліміз аман, жұртымыз тыныш болсын. Жаңа жыл халқымыз үшін берекелі жыл болсын!