Күндерді күндер күлтелеп, апталар айға алмасып, айларға жыл жалғасып жатады осылай. Егер осындай бір ырғақ қайталанып тұрмаса, уақыт деген ұғым далиған кеңістікке ғана айналып арзандап қалар ма еді...

Мұның алдындағы бұрынғы өткен жылдарға қалай қарасақ, өз өңірімізге де, бүкіл елімізге де сәтті болған 2024 жылға өкпелей алмаймыз.

Көктем кезіндегі асау толқынды табиғаты арқылы тосын мінез танытып, топан су тасқынымен ел пейілін тексермекші болған Жаратқанның сынынан, шүкір, жұмыла көтеріп, жүкті жеңілдеткен республика жұрты болып сүрінбей өттік. Жазға салым Жаңатастың бірнеше тұрғынын әбігерге салған мұндай су басуды аймағымыздың ел ағалары да абыроймен еңсерді.

Әйтсе де, елдің ауызбіршілігін, сүттей ұйыған тату-тәтті тірлігін паш еткізген бұл жыл біздің облысымызда негізінен ылғи жағымды жаңалықтарымен есте қалмақшы.

Ұлағатты үлгісімен жаңа тарих қойнауына енгелі тұрған ұлу жылының әулиеаталықтар үшін жемісті, жеңісті, табысты жыл болғанын атап өтпеске болмайды.

Еліміздің ырыс-несібесін, бақ- берекесін арттырып келген ұлу дүниежүзілік дағдарыс деген дүниеден ел еңсесін тіктеп кете алмай тұрған шақта мейлінше мейірімділігіне бөлеп, ырысы мен құтын, жаңалығы мен жақсылығын аймағымызға молынан үйіп-төкті.

Жыр алыбы атындағы жасампаз Жамбылымызда әлеуметтік-экономикалық саланың барлық бағыты бойынша маңызды нәтижелерге қол жеткізілді.

Мемлекет тарапынан қабылданған көптеген жобалар мен бағдарламаларды жүзеге асыру жұмысы жүйелі жалғастырылды. Ауыл шаруашылығы, өнеркәсіп, басқа да түрлі салаларда экономикалық өсімді қамтамасыз етумен түбегейлі айналысып отырған аймағымыздың облыс орталығы мен аудандарында құрылыс жұмыстары қарқынды жалғастырылды. Көпқабатты үйлер салынды. Жолдар жаңғырды. Инфрақұрылым жақсарды.

Сондай-ақ, Байзақ пен Жамбыл аудандарындағы 14 ауыл Тараз қаласының құрамына қосылып жатыр. Осылайша облыс орталығы Тараз қаласының аумағы 13 мың гектарға ұлғаяды. Айтулы оқиғаларға толы жылда аймағымызда бұдан да басқа ауыз толтырып айтарлық жаңалықтар жетеді. Әсіресе, спорт бағытында алынған асу, бағындырған біршама белес бар. Жамбылдық спортшылар жыл басынан бері 1635 медаль жеңіп алған. Оның 572-сі алтын, 521-сі күміс, 542-сі қола жүлде. Биылғы жылдың ең үздік жетістігі – «Париж – 2024» жазғы Олимпиада ойындарында жерлесіміз Елдос Сметовтың дзюдодан алтын медальды қанжығасына байлауы. Дзюдодан тұңғыш Олимпиада чемпионы болған Елдос секілді бірталай жүлдегер спортшыларымыз алдағы уақыттарда да ел үмітін ақтауға уәде беріп отыр.

2024 жыл әдебиет пен мәдениет, өнер саласына да ерекше көңілдің бөлінуімен жамбылдықтардың есінде қалатын болады. Ұлт тарихында ғана емес, халықтың руханияты мен әдебиетінде де айшықты қолтаңбасы қалыптасқан Әулиеата жерінде аймақ басшылығы тарапынан жергілікті қаламгерлерге қолдау үздіксіз көрсетілуде. Мемлекет және қоғам қайраткері Т.Рысқұловтың 130 жылдығы, сатирик ақын Ш.Смаханұлының 100 жылдығы, Қ.Тұрысовтың 90 жылдығы секілді мерейтойлар лайықты аталып өтілді. Өңіріміздің біртуар тұлғаларының атымен жүлделер тағайындалған «Асқақ рухты Әулиеата» республикалық конкурсы бұрын-соңды болмаған жоба.

Әне-міне дегенше Жаңа жыл төрімізге аяқ басып, күнтізбеге өзгеріс жасалатын сәт те таяу тұр. Ешкімді ренжітпеген ескі, бірақ жағымды жылмен қоштасқалы жатқан біздің халқымыз табалдырықта тұрған жылан жылынан да көп жақсылық күтеді. Әлімсақтан сән-салтанатымен аталып өтілетін осынау мереке үлкеннің де, кішінің де көңілін көтеріп, көкейге қуаныш сезімін ұялататыны сөзсіз. Жаңа жыл әрқашан жаңа үміт, жаңа қадаммен байланыстырылатын сиқыры бар бір ғажайып ұғым. Сондықтан өткен жылғы игі істер келер жылы да жалғасын таба берсін деп тілейік.

Үміт БИТЕНОВА