Биыл өңірімізде өнеркәсіп, кәсіпкерлік саласы алға басып, инвестиция тартудан жақсы көрсеткішке қол жетті. Жамбыл Жаңафосфор зауыты жанынан акумулятор шығаратын зауыт салынбақшы. Жамбылдық химияшылардың өндірген сары фосфоры Қытай, Израиль елдеріне дейін сатылып, үлкен сұранысқа ие болып отыр.

Біздің өңірдің Талас пен Сарысу ауданының ортақтасқан жерінен «ҚазСода» жауапкершілігі шектеулі серіктестігі зауыт салуға кірісті. Аз жылда осы жұмыс та өзінің жемісін беріп қалуы тиіс. Зауыттың ашылуы тұрғындарға жаңа жұмыс көзі болатыны анық. Шу ауданындағы бұрыннан айтылып келе жатқан химия зауыттары жүзеге асатын уақыт та алыс емес. Мұның баршасы облыс әкімі Ербол Қарашөкеевтің іскерлігі мен жоғары ұйымдастырушылығының арқасында жүзеге асып отыр. Өңір басшысы ауыл шаруашылығын өте жетік білетін кісі.

Ауыл шаруашылығын ілгерілету, ауыл халқын тұрақтандыру мәселесі бойынша да еңбек адамдары уақытпен санаспай, тер төгіп жұмыс істеп жатыр. Қазір «Ауыл аманаты» деген жоба бар. Ол арқылы да талай отбасы малына мал қосып жатыр. Бұл жоба да өзін ақтайтын, тұрғындардың көсегесін көгертетін жоба деп сенемін. Сондықтан, өткен жыл жемісті жыл болды деп айта аламын. Бір ғана ауыл шаруашылығында көптеген ілгерілеу жұмыстары жүзеге асты. Әр ауылда, әр отбасында ілгерілеу болды. Қазақта «Баспана – бақыт шамы» деген сөз бар. Соңғы жылдары облысымызда көпқабатты тұрғын үйлер көп салынып жатыр.

Тараз қаласын айтпағанда, Байзақ, Жамбыл, Меркі, Қордай аудандарында көпқабатты тұрғын үйлердің салыну қарқыны көңіл қуантады. Талас, Сарысу аудандарында да алдыға қадам, оң серпілістер бар. Соның нәтижесінде жылына жүздеген отбасы баспаналы болып, қоныс тойын тойлап жатыр. Сондықтан, тұрғын үй алу жағы бұрынғыдан жеңілдеді. Бұл дегеніміз – жас отбасылардың үйлі болуына мүмкіндік. Келетін 2025 жылдан да зор жаңалық, жарқын жетістік, жақсылықтар күтеміз. Әр шаңыраққа бақыт пен береке, молшылық, тыныштық, зор денсаулық тілеймін!