Энергетика саласы – адам өміріне ауадай қажет мамандық. Ұдайы тиянақтылық пен ұқыптылықты қатаң қағидаға айналдырған энергетиктер қателікке жол бермеуді басты назарда ұстайды. Шындығында, адам өміріне қауіп төндіретін салада жұмыс істеу асқан жауапкершілікті, тиянақтылықты талап етеді. Қапелімде орын алған қателік орны толмас шығынға ұшыратады. Көзге көрінбейтін, иісі шықпайтын, өздігінен ұстап көре алмайтын токтың қуаттылығы жоғарылаған сайын адамға да қауіптілік еселенеді. Әр істі елеп-екшеп, мұқият жоспарлап, сақтықты назарда ұстау – кәсіби маманның міндеті. Міне, осы талаптан шығып жүрген сала мамандарын облыс әкімінің орынбасары Қанатбек Мәдібек арнайы қабылдап, энергетиктер күні қарсаңында марапаттады.
Энергетиктер үшін бүгін ерекше күн. Бұл саланың ел экономикасына қосып отырған үлесі зор. Біз бір күнді де жарықсыз елестете алмаймыз. Сіздердің еңбектеріңіз қай кезде де құрметке лайықты. Жалпы, бұл сала қызметкерлерінің электр желісінде орынсыз олқылықты болдырмау үшін жұмыс барысында түбегейлі ұтымды шешім қабылдау маңызды. Себебі, электр жүйесінің тұйықталуы мен зақымдалуын уақытында қалыпқа келтіруде түрлі қиындықтар кездесетіні рас. Ісі мен сөзі сай келіп, білімі мен білігі ұштасып, жауапкершілік жүгін арқалағандардың қатарында бүгінгі өздеріңіз сияқты мамандардың барына біз қуанамыз, – деді Қанатбек Мәдібек.
Жиын соңы марапатқа ұласты. Үшінші дәрежелі «Еңбек даңқы» орденімен «Жаңатас-Су-Жылу» мекемесінің бас инженері Ерлан Нұрмаханов марапатталса, еңбекте еңбегі ескерілген бірқатар энергетиктер «Ерен еңбегі үшін» және «Электр энергиясы саласына қосқан үлесі үшін» медальдарымен, сондай-ақ басқа да арнайы төсбелгілермен, Құрмет грамоталармен және Алғыс хаттармен марапатталды.
Марат ҚҰЛИБАЕВ
Ұқсас жаңалықтар
