Бала санасына ұлттық құндылықтарды ерте жастан сіңіру — келешекте елжанды азаматтардың қалыптасуына әсер етеді. Бұл ретте бүлдіршіндерді отансүйгіштікке тәрбиелеуді балабақшадан бастаған ләзім. Байзақ аудандық білім бөліміне қарасты «Мұрагер» бөбекжай-бақшасы бұл міндетті жоғары деңгейде орындауда.
Жуырда аталған бөбекжай-бақшаның «Зерде» тобында «Әжемнің ертегілері» тақырыбында ертеңгілік ұйымдастырылды. Іс-шараны ұйымдастырған тәрбиеші Гүлмира Насирова кішкентай бүлдіршіндерге түрлі өлеңдер жаттатып, ертегілерді нақышына келтіріп оқып берді. Жалпы, бұл топта 28 бүлдіршін тәрбиеленуде. Тәрбиешінің ізденімпаздығының арқасында жоғары деңгейде өткен іс-шараға балалардың әжелері Орынкүл Кенжебекова мен Шамша Жұмабаева қатысып, ата дәстүрдің озық үлгісін көрсетті.
Әжелер балаларға «Жануарлар патшасы кім?», «Үш қозы» сынды ертегілерді оқып берді. Ал, әжелердің қызықты ертегісіне алғыс ретінде осы топтың кішкентай әншісі Медина Нахан ән шырқады. Іс-шараға қатысушы ата-аналар мен әжелер балалардың танымын кеңейткен ерекше іс-шараны ұйымдастырған Гүлмира Рашидқызына ризашылықтарын білдіріп, алдағы жұмыстарына сәттілік тіледі.
Арайлы ЖАҚСЫЛЫҚ
Байзақ ауданы
Ұқсас жаңалықтар
