Жалпы, кез келген мемлекеттің қос қанаты – атқарушы билік пен азаматтық қоғам. Демек, билік өкілдері мен қоғамда азаматтық белсенділігі жоғары адамдар бірлеспей іс ілгері баспайды. Ал, дамыған елдерде осынау қос тарапқа теңестірілген мүмкіндіктің берілуі – олардың өркендеуінің негізі болып отыр. Шын мәнінде, озық мемлекеттерде үкіметтік емес ұйымдар саяси-экономикалық, әлеуметтік және мәдени-рухани әлеуетке ие. Бұл күнде республика аумағында осы бағыттағы ұйымдардың жұмысын жандандыру мақсатында жүйелі жұмыстар қолға алынып келеді. Десек те, бұл салада шешімін күткен түйткілдер баршылық.
Аймақ басшысының орынбасары Серік Сәлемовтің төрағалығымен өткен басқосу барысында қоғамда үкіметтік емес ұйымдардың рөлін күшейту мәселесіне ден қойылды. Облыс әкімдігінің жанындағы үкіметтік емес ұйымдармен өзара іс-қимыл және ынтымақтастық жөніндегі кеңеске үкіметтік емес ұйымдардың жетекшілері қатысты. Онда осы жылы үкіметтік емес ұйымдармен атқарылған жұмыс нәтижелері мен келер жылға жоспарланған әлеуметтік жобалардың тақырыптары талқыға түсті. Жиында ең әуелі сөз алған Серік Жақсылықұлы өңірде қолға алынған іс-шаралар мен мемлекеттік бағдарламаларды жүргізуде үкіметтік емес ұйымдар тарапынан айтарлықтай жұмыс атқарылғанын атап өтті. Ол өз сөзінде биыл облысымызда мемлекеттік әлеуметтік тапсырыс шеңберінде 135 әлеуметтік жоба жүзеге асып жатқанын тілге тиек етіп, осы ретте үкіметтік емес ұйымдардың жұмысын одан әрі жандандырудың маңыздылығына тоқталды.
Сондай-ақ, басқосуда облыс әкімдігінің білім басқармасының және Тараз қаласы мен Т.Рысқұлов, Мойынқұм аудандары әкімдіктерінің үкіметтік емес ұйымдармен жұмысы баяндалды. Бұдан бөлек, қоғам өміріне білек сыбана араласуға ниетті белсенді азаматтарды қаржылық қолдау, олардың әлеуметтік мәні зор бастамаларына көмек көрсету мәселелері де назардан тыс қалмады. Сонымен қатар, кеңесте бірқатар үкіметтік емес ұйымдардың жетекшілері сөз алып, азаматтық секторды дамытуға қатысты өздерінің ұсыныс-пікірлерін ортаға салды. Жиын соңында 2025 жылға жоспарланған мемлекеттік әлеуметтік тапсырыстың тақырыптары, басым бағыттарының тізбесі мен аталған кеңестің 2025 жылға арналған іс-шаралар жоспарының жобасы бекітілді.
Есен ӨТЕУЛІ
Ұқсас жаңалықтар
