Мемлекет басшысы Қазақстан халқына Жолдауында ел дамуының басым бағыттарына тоқталды. Алдағы онжылдықтарға арналған жаңаша мақсат-міндеттерді, болашақ жоспарларын ортаға сала отырып, 2030 жылға қарай елде орын алатын энергия тапшылығының алдын алу қажеттігі ойластырылып жатқандығын атап айтты. Бұл мәселенің шешімі ретінде ұсынылып отырған – елде атом электр станциясын салу екендігі белгілі.
Шындығында ел дамуының басты шарты – энергияға келіп тірелетіні белгілі. Сала мамандары АЭС салудың экономикалық қажеттілігін түсіндіруде. Алғашында атом дегенде үріккендей болған халыққа оның артықшылықтары, қорқудың қажеттілігінің жоқ екендігі түсіндірілуде.
Бұл жерде мемлекетіміздің басты ұтары – уран өндіруден жетекші орындағы ел екеніміз. Табиғи байлығымыз – уран арқылы электр энергиясын қажетті мөлшерде және арзан өндіріп, сәйкесінше, өндірістік-индустриялық дамуға мол мүмкіндіктер аламыз. Ең бастысы, салынатын зауыттың құрылысын қатаң қадағалауда ұстау керек. Зауыттың қауіпсіздігі мен экологиялық тазалығына кепілдік болуы шарт. Халықты алаңдататыны да – осы. Яғни, атом электр станциясы Қазақстан экономикасының дамуына үлкен серпін беретінін әркім біледі, алайда, оның зардабының да қаншалықты екендігіне алаңдайтыны шындық.
Осы орайда, АЭС-тың салынатын жері турасында көптеген қарсылықтар болды. Осыдан келіп, жалпыхалықтық мәселенің шешімі халықтың өзіне тапсырылып отыр. Жалпыхалықтық мәселеде әркімнің өз көзқарасы маңызды деп санаймын. Ендеше, оның салынуынан үлкен даму мақсаттарын күтейік.
Жамбыл МЫРЗАБЕКОВ,
Ш.Мұртаза атындағы халықаралық Тараз инновациялық институты «Тарих және география» кафедрасының меңгерушісі, PhD философия докторы.
Ұқсас жаңалықтар
