Мемлекет басшысы Қасым-Жомарт Тоқаевтың күні кеше ғана өзінің «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында «Еліміздің тұрақты дамуына мүмкіндік беретін жаңа тетіктерді қарастырған жөн. Басты мақсат – азаматтардың табысын арттыру. Жұмысты дұрыс үйлестіре білсек, бұл – қолдан келетін шаруа» деп, әрбір шешімнің елге пайдалы болуын ескертіп, халықтың әл-ауқатын жақсартуға септігі тиетін шараларды қолға алуды, «Халық үніне құлақ асатын мемлекет» қағидасын орнықтыруға іс жүзінде жан-жақты ықпал етуді тапсырған болатын.

Осы ретте кеше облыс әкімі Тараз қаласы мен Байзақ, Жамбыл, Меркі, Талас ауданының тұрғындарын қабылдап, олардың мәселелеріне құлақ түрді.

Қабылдауда болған азаматтар тұрғын үй-коммуналдық шаруашылық, жұмыспен қамту, денсаулық сақтау, ветеринария, кәсіпкерлік, жол және жер саласына қатысты ұсыныстар мен өтініш-тілектерін айтты. Өзге де мәселелер бойынша шағымдарын білдірді.

Ербол Қарашөкеев жауаптыларға өтініш иелерінің мәселелерін мұқият зерделеп, заң талаптарына сәйкес шешім қабылдау бойынша тапсырма берді.

Облыс әкімінің баспасөз қызметі.