Министрліктің мәліметінше, жыл басынан бері балалардың терезеден құлауы туралы 152 хабарлама келіп түскен. Салдарынан оқиға орнында 16 бала қайтыс болып, қалған 136-сы әртүрлі жарақаттармен ауруханаға жатқызылды. «Тек жазғы кезеңнің өзінде Төтенше жағдайлар министрлігінің Стратегиялық жоспарлау және жедел басқару командалық орталығы 108 жазатайым оқиғаны тіркеді. Көп таралған себептерінің бірі – балаларды ата-аналарының қараусыз қалдыруы. Бұл жағдайда заманауи терезелерге орнатылған москиттік торлар ең үлкен қауіп тудырып отыр», – делінген хабарламада.

Биыл күн жылынысымен ведомствоның аумақтық бөлімшелері қауіптің алдын алу жұмыстарын күшейткенін атап өткен жөн. Осылайша, көпбалалы отбасылардың пәтерлерінде ТЖМ құтқарушылары терезелерге үш мыңнан астам бұғаттау құрылғысын орнатты. Құтқарушылар «Өзіңнен баста!» ведомстволық челленджі аясында осындай арнайы құлыптау механизмін үлгі ретінде өз үйлеріне де орнатты. Жиырма аумақтық бөлімшенің қызметкерлері осы процесті көрсете отырып, халықты оқытты. Осындай іс-әрекеттер арқылы балаларды кез келген оқыс оқиғалардан қорғай білу, олардың амандығы бәрінен де маңызды екенін еске салды.

Енді бұл челленджді еліміздің Оқу-ағарту министрлігі жалғастырмақ.

Жүрсінгүл ЖАҚЫП