– Біздің балаларымыз Үкімет тарапынан жасалған жағдайлардың нәтижесінде жан-жақты білім алып, республикалық, халықаралық олимпиадалар мен шығармашылық байқауларда, спорттық додаларда жүлделі орындарды иеленіп, бізді қуантуда. Республикалық олимпиада қорытындысы бойынша облысымыздың оқушылары биыл «Ең үздік олимпиадалық команда» атанғаны – біздің мақтанышымыз. «Білімдінің күні – жарық, білімсіздің күні – ғаріп» демекші, білімді ұрпақ тәрбиелеу – қазіргі уақыттың негізгі талабы. Еліміздің ертеңгі абыройын асқақтату – ол біздің бүгінгі өрендеріміздің мерейлі міндеті. Ал біздің басты мақсатымыз – сол оқушылардың сапалы білім алуына қолайлы жағдай жасау. Жаңа оқу жылы жағымды жаңалықтарға толы болсын, игілікті істеріңізге педагогикалық ізденіс, жаңа серпін, шығармашылық табыс тілеймін, – деді Әбілхайыр Ғалымұлы.

Бұл білім ошағында биыл 198 бүлдіршін 1 сыныпқа қабылданып, оқушы атанды. Білім мен тәлімді насихаттаған салтанатты жиын барысында мектептің көркемөнерпаз балалары өз өнерлерін ортаға салып, келген қонақтарды, ата-аналар мен ұстаздарды қуанышқа бөледі.

Айта кетейік, мектептердегі мерекелік салтанатты жиындарға тек 1 мен 11-сынып оқушылары қатысып, алғашқы қоңырау соғылды.

Қамар ҚАРАСАЕВА