Балалардың игілігіне берілген №63 мектеп «Арай» алабында орналасқан. 600 балаға арналған су жаңа білім ұясының ашылу салтанатына облыс әкімінің бірінші орынбасары Нұржан Календеров арнайы келіп, балаларды білім күнімен құттықтады.

Жаңа білім ұясы қажетті құрал-жабдықтармен, білім алуға керек материалдық-техникалық базамен толық қамтылған. Оқу бөлмелері кең, жарық. Балалар үшін түрлі үйірме сыныптары қарастырылған. Биылғы оқу жылында аталған білім ошағының табалдырығын 485 оқушы аттаса, оның 81-і бірінші сынып оқушылары. Мектеп құрылысын «Строймонтажгрупп» ЖШС жүргізген.

Салтанатты іс-шара барысында жаңа мектепке облыс әкімінің арнайы сыйлығы тарту етілді. Ал мектептің лентасын облыс әкімінің бірінші орынбасары Нұржан Календеров пен осы аймақтың ақсақалы Ермекбай Сәлімбаев қиды.

– Балаларымыз мемлекет тарапынан жасалған жағдайлардың нәтижесінде жан-жақты білім алуда. Мектеп білімнің ғана емес, тәлім-тәрбиенің ордасы. Ал, білімді ұрпақ – ертеңгі мемлекет тұтқасы. Таразда екі бірдей мектептің ашылуы жаңа оқу жылымен тұспа-тұс келіп отыр. Қуаныштарыңыз құтты болсын, – деді Нұржан Сәбитұлы.

Оқушыларды жаңа мектепке қабылдау салтанаты әрі қарай концерттік бағдарламаға ұласып, оқушылар «Мектебім – мейірім мекенім» тақырыбындағы сынып сағатына қатысты.

Арайлы ЖАҚСЫЛЫҚ