Мемлекет басшысы Қасым-Жомарт Тоқаев өткен жылы жастарға арнайы жолдаған Үндеуінде «Елімізде жүзеге асырылып жатқан әрбір бастама, ең алдымен, сіздерге арналады. Қазіргі реформалардың игілігін көретін де, елдік істерді жалғастыратын да – сіздер.

Шын мәнінде, кез келген мемлекетті тұрғындарына қарап бағалайды. Яғни, біздің қандай ел боларымыз өскелең ұрпаққа байланысты. Сондықтан жастарымыз отаншыл, білімпаз, еңбекқор, үнемшіл, әділ әрі жанашыр болуы қажет. «Жастар спортпен, дене шынықтырумен айналысуы керек. Мен мұны үнемі айтып жүрмін. Осы құндылықтарды барынша насихаттап, тарату қажет. Сонда жеке адамның қасиеті тұтас ұлттың қасиетіне айналады» деген еді.

Осы онкүндік аясында облыс әкімдігінің ақпарат және қоғамдық даму басқармасының «Жастар ресурстық орталығының» ұйымдастыруымен облыстық қан орталығында «JAS KELSE ISKE» жобасымен «Шын жүректен» атты донор болу акциясын өткізді. Акцияның басты мақсаты – жастарға қан мен оның компоненттерін қайта құю арқылы адам өмірін құтқарып, денсаулығына қауіп-қатер төнген жандардың өмірін ұзартуға мүмкіндік бар екендігін ұғындыру.

– Онкүндік аясында өтетін іс-шаралар өңіріміздің әрбір аймақтарында, ауылдарда да ұйымдастырылады. Алғашқы іс-шарамыз «Тарихқа тағзым» атауымен 2000 жылдық тарихы бар Тараз қаласындағы тарихи ескерткіштер – Тектұрмас, Қарахан баба, Айша бибі кесенелері мен Талас өзені бойын тазартумен басталған болатын. Арнайы ашылу салтанатында ақсақалдардың батасын алдық. Оған Жамбыл, Жуалы, Байзақ аудандары мен Тараз қалалық Жастар ресурстық орталықтарының мамандары, волонтерлер, Жасыл ел жасақтары бар, барлығы 250-ге жуық жас қатысты. Біз акциямызды тарихи орындармен бастау арқылы кешегімізге көз жүгіртіп, өткенімізге құрмет көрсетіп, келешекке жаңа қадам басудың тиімділігін ескердік.

Адамзат үшін бірінші байлық – денсаулық. Сондықтан біз онкүндік акциямыздың екінші іс-шарасын өзгеге өмір сыйлау қайырымдылығына арнап, донор болуды насихаттап, облыстық Қан орталығына барып, қан тапсырдық. Оған аудандар мен екі қаладан барлығы 250 жас үлес қосты. Сол секілді «Ғылым таппай мақтанба» тақырыбымен зияткерлік сайысын өткіздік. Алдағы 12 тамызға дейін үлкенге құрмет көрсету, айналасындағыларға қамқорлық таныту негізіндегі істеріміз жалғасатын болады. Әрине, жастардың игі істері бұл онкүндікпен шектелмек емес, – дейді облыстық Жастар ресурстық орталығының директоры Айбек Кадралиев.

Мерекені ізгілікпен атап өтіп, жақсылықты үзіліссіз жалғастыруды мақсат еткен облыс жастарының қадамына құт қонсын демекпіз. Бүгінгі жеткіншектердің көңіл қуантар әрекеттеріне қарап, болашаққа деген сенім де беки түсетіндей.

Қамар ҚАРАСАЕВА