Жақында қорытындыланған 2023-2024 оқу жылында облыстың 85 жылдығына орай, жалпы білім беретін пәндер бойынша ғылыми жобалар конкурсының республикалық кезеңі Тараз қаласы, Жақсылық Үшкемпіров атындағы «Тараз-Арена» спорт кешенінде өтті. ISEF-2024 Дүниежүзілік Ғылым және техника көрмесіне сәйкес өткізілген байқауға еліміздің әр облысынан 912 оқушы қатысты. Өз облысымыздың 46 оқушысы бақ сынап, 27 жас ғалым 3 алтын, 8 күміс, 16 қола медальді иеленді. Нәтижесінде, облыс командасы 15-ші жыл қатарынан «Ең үздік команда» номинациясын жеңіп алған болатын.

– «Өскелең ұрпақтың үйлесімді дамуы мен бақытты балалық – бұл біздің жалпыұлттық міндетіміз», деп Мемлекет басшысы Қасым-Жомарт Тоқаев атап өткендей, облыстың дарынды жеткіншектері өз қарым-қабілетін дамытып, білімін дәлелдеп келеді. Республикалық «Зерде» конкурсында жас ізденімпаз зерттеушілер 1 алтын, 4 күміс, 13 қола медальді иеленсе, «ProEco» экологиялық жобалар конкурсына қатысқан 3 оқушы жеңімпаз атанды. Халықаралық Өмірбек Жолдасбеков атындағы математика және механика зерттеу жобаларынан 4 оқушы 3 күміс медаль, 1 қола медаль, ғарыштық зерттеулер бойынша «Ғылым әлемін ашамыз» халықаралық ғылыми жарысына қатысқан 6 оқушының 4-еуі жеңімпаз, 2 күміс медаль, 2 қола медальді олжалады. 2023-2024 оқу жылында алғаш рет республиканың ауылдық жерлердегі мектеп оқушыларының арасында академиялық қабілетті оқушыларды іріктеу, олардың одан әрі зияткерлік дамуы мен кәсіби бағдарлануын қамтамасыз ету мақсатында «Ауыл мектептері арасында жалпы білім беретін пәндер бойынша республикалық олимпиада» ұйымдастырылды. Облысымыздан қатысқан 49 оқушының 22-сі 1 алтын, 7 күміс, 14 қола медальді иеленіп, республикалық кезеңнің жеңімпазы атанды. Жалпы білім беретін пәндер бойынша республикалық олимпиадаға 64 оқушы қатысып, 29 оқушы 4 алтын медаль,13 күміс медаль,12 қола медальға ие болды. Нәтижесінде облысымыздың командасы «Ең үздік олимпиадалық команда» номинациясын иеленді, – деді Лаззат Абильдақызы.

Жамбылдық оқушылар халықаралық олимпиадаларға да қатысып, ел намысын қорғап жүр. Жақында ғана 1-4 шілде күндері Сербия республикасының Белград қаласында өткен географиядан Еуропалық олимпиадасында «Дарын» лицей-интернатының 11-сынып оқушысы Сабыр Жомарт қола медальды иеленіп, алдағы Ирландия мемлекетінің Дублин қаласында өтетін географиядан халықаралық олимпиадаға қатысып, білім бәйгесінде бағын сынамақ. Болгария елінде өткен математика пәнінен Халықаралық 41-ші Балқан олимпиадасынан «Білім-Инновация» лицей-интернатының 10-сынып оқушысы Шарел Марғұлан күміс медальды иеленіп, Ұлыбританияның Бат қаласында өткен халықаралық олимпиададан тағы да күміс медальға қол жеткізді. Сонымен қатар, Өзбекстан республикасында Авиценна атындағы халықаралық олимпиадасына «БІЛІМ-ИННОВАЦИЯ» лицей-интернатының оқушысы Рауан Есен қатысып, қола медаль иеленсе, Амина Ғалымжанқызы Бразилияда өтетін лингвистикадан халықаралық олимпиадаға жолдама алған. Әлемнің 24 елінің қатысуымен Грузия мемлекетінде өткен «EJOI-2023» информатикадан Еуропалық жасөспірімдер олимпиадасына «Білім-Инновация» лицей-интернатының оқушысы Сұңғат Серікбай қатысып, күміс медальды олжалап келген.

Қамар ҚАРАСАЕВА