Жаңатас қаласындағы аудандық орталық ауруханада Оңалту бөлімі ашылды. Зиялы қауым өкілдері мен ардагерлер және тұрғындар қатысқан салтанатты жиында сөз сөйлеген аудан әкімі Сәкен Мамытов пен аудандық ардагерлер кеңесінің төрағасы Жанат Жұмаділдаев салауатты өмір салтын насихаттап, адам денсаулығына жіті көңіл бөлу, мүмкіндігі шектеулі жандарға қолайлы жағдай жасай отырып, қоғамдық ортаға бейімдеу шараларының маңыздылығына тоқталып, көпшілікті мақсатты жұмыстың тағы бір сәтті нәтижесімен құттықтады.
Бүгінде денсаулық сақтау жүйесін жетілдіру, дамыту, медициналық қызмет сапасын одан әрі арттыру – мемлекеттік саясаттың басым бағыттарының бірі болғандықтан, бұл іс-шараның аудан халқы үшін маңызы өте зор.
Қазіргі таңда Сарысу аудандық орталық ауруханасына қарасты 1 қалалық емхана, 1 Саудакент ауылдық емхана, 6 Дәрігерлік амбулатория, 5 фельдшерлік акушерлік пункт, 14 медициналық пункт тұрғындарға қызмет көрсетуде. Медициналық ақпараттық жүйе (РПН) бойынша 38 929 адам тіркелген. Ауданда емдеу мекемелері заманауи құралдармен, медициналық технологиялармен жабдықталып, емдеу шараларын көрсететін орындардың қатары көбеюде.
Науқас жандарды емдеудің маңызды кезеңдерінің бірі – медициналық оңалту. Ауыр жарақат пен аурулардан кейін адам әдеттегі өмір салтына оралып, жоғалған қабілеттерін қалпына келтіруі қажет. Осындай кезеңде Оңалту орталығы науқастар мен мүгедектігі бар жандардың денсаулығын қайта қалпына келтіруге үлкен ықпал етеді.
Жаңадан ашылған Оңалту бөлімі түрлі науқастарға емдік шараларын жүргізетін, жалпы соммасы 2,7 миллион теңгені құрайтын қажетті медициналық қондырғылармен жабдықталған. Орталықта тәжірибелі мамандар жұмыс істейді. Бұл жерден алған емдік шаралар адам ағзасының нығаюына ықпал етіп, қайта қалпына келтіруге, науқас жандардың ауруынан айығуына көмектесетіндігіне жұрт сенімі мол.
Сарысу ауданы
Ұқсас жаңалықтар
