Облыстық полиция департаментінің есірткі қылмысына қарсы іс-қимыл басқармасының қызметкерлері «Қарасора-2023» жедел-профилактикалық іс-шарасы аясында Тараз қаласының Махамбет батыр көшесіндегі зират маңынан қару-жарақ пен оқ-дәрілер салынған 3 полиэтилен қапшығын тапты. Жедел ақпаратты іске асыру барысында табылған қаптардан 10,25 мм калибрлі 3 оқ-дәрісі бар «Сайга 410» маркалы өздігінен оқталатын тегіс ұңғылы карабин, 16 мм калибрлі «ИЖ КА» маркалы бір ұңғылы аңшы мылтық табылды. Бұдан бөлек, Қаңтар оқиғасы кезінде облыстық полиция департаментінің қоймасынан ұрланған 12 мм калибрлі «Hatsan» маркалы бір ұңғылы тегіс ұңғылы винчестер мен зауыт нөмірі жойылған 16 мм калибрлі «ИЖ 17» маркалы бір ұңғылы тегіс ұңғылы аңшы мылтығы бары анықталды. – Қазіргі таңда бұл дерек бойынша Қылмыстық Кодекстің 287-бабы 3-бөлімі (қаруды, оқ-дәрілерді, жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеп- тексеру амалдары басталды. Сот-баллистикалық сараптама тағайындалды, – деді облыстық полиция департаменті есірткі қылмысына қарсы іс-қимыл басқармасының бастығы, полиция подполковнигі Әлім Бажықбаев.  

Дайындаған Есен ӨТЕУЛІ.