Елімізде қолданыстағы заңға сәйкес шекараны заңсыз кесіп өтетіндерге ең қатал жаза қолданылады. Яғни, мұндай заң бұзушылық қадамға барғандар сот үкімімен бас бостандығынан айырылады. Алайда, заңды белшесінен басқысы келетіндердің қатары әлі күнге азаймай тұр. Өңірлік Қылмыстық-атқару жүйесі департаментіне бағынысты №26 түзеу мекемесінде жазасын өтеген Шри-Ланка мемлекетінің 3 азаматы осындай іс-әрекетке барғаны үшін айыпты деп танылған. Дәлірек айтсақ, оңтүстік Азиядағы аралды елдің азаматтары тәуелсіз Қазақстанның шекарасын заңсыз кесіп өтпек болғанда қолға түскен. Осылайша, олар бас бостандығынан айырылып, темір торға тоғытылады. Жуырда жаза мерзімінің аяқталуына байланысты еркіндікке жолдама алған шетелдіктерді депортациялау жұмыстары бұдан әрі Ұлттық қауіпсіздік комитетінің өкілдеріне жүктеліп отыр.  

Дайындаған Есен ӨТЕУЛІ.