Бүгінгі таңда бас бостандығынан айырылған азаматтарды жұмыспен қамту күнтәртібінен түскен емес. Өйткені, түзеу мекемесінің тірегі – еңбек. ҚАЖ қызметкерлері арнайы контингентті тәрбиелеуде оларды еңбекке баулудың маңызды екенін жиі айтады. Тәртіп сақшыларының сөзінше, еңбекке жарамды азаматтардың жабық мекемелерде «екі қолға бір күрек» табуы олардың түзелуіне әрі еркін өмірге ерте қадам басуына мол септігін тигізеді. Өңірлік Қылмыстық-атқару жүйесі департаментіне бағынысты №26 түзеу мекемесінде сотты болғандардың бос уақытын тиімді ұйымдастыру әрі оларды еңбекке баулу жұмыстары жүйелі жүргізіледі. Мәселен, сот үкімімен кінәлі деп танылған жандар мекемеге келген күннен бастап әлеуметтік-құқықтық кеңестер берілген соң, жұмысқа тартылады. Осылайша, олар мекеме аумағын тазалау, абаттандыру жұмыстарын атқарады.